ہیلی کاپٹر کریش میں 6 امریکی فوجیوں سمیت امن مشن کے 8اہلکار ہلاک

مصر: صحرائے سیناء میں ہیلی کاپٹر حادثے کے نتیجے میں 6امریکیوں فوجیوں سمیت8اہلکار ہلاک ہوگئے۔

خبر ایجنسی کا اس حوالے سے کہنا ہے کہ ہلاک ہونے والے دیگر 2 فوجیوں میں سے ایک کا تعلق فرانس اور ایک کا جمہوریہ چیک سے ہے۔رپورٹ میں یہ بات سامنے آئی ہے کہ مرنے والے تمام اہلکار کثیر القومی مبصر فوج (ایم ایف او) کے امن مشن کا حصہ تھے۔

ایم ایف او حکام اس خبر کے حوالے سے مزید تفصیلات سامنے نہیں لائے، تاہم اُن کا کہنا ہے کہ وہ ایک ہیلی کاپٹر کے حادثے کی تحقیقات کررہے ہیں، ایم ایف او حکام نے حادثے میں ہلاک ہونے والے فوجیوں کی تعداد کے بارے میں آگاہ نہیں کیا۔

نام ظاہر نہ کرنے کی شرط پر اسرائیلی ذرائع نے خبر ایجنسی کو ہیلی کاپٹرحادثے اور اس میں ہونے والی 8 ہلاکتوں کے بارے میں آگاہ کیا۔

یادرہے کہ کثیر القومی مبصرفوج (ایم ایف او) اقوام متحدہ سے الگ ادارہ ہے اور اس کا ہیڈکوارٹر اٹلی کے دارالحکومت روم میں ہے، اس فورس کو مصر اور اسرائیل کے 1978 میں ہونے والے تاریخی کیمپ ڈیوڈ معاہدے کے تحت اس کو قائم کیا گیا تھا۔

ایم ایف او اسرائیل اور مصر کے درمیان امن مشن پر موجود ہے، یہ زیادہ تر مصر اور اسرائیل کے درمیان موجود مصر کے جزیرہ نما صحرائی علاقے وادی سیناء میں ذمہ دارایاں سرانجام دیتی ہے اور امن و امان کے حوالے سے اقدامات کرتی ہے۔