گوگل نیوز پر ہمیں فالو کریںکراچی: پاکستان سپر لیگ (پی ایس ایل) میں کراچی کنگز کے فاسٹ بولر حسن علی نے ایک تاریخی سنگ میل عبور کرتے ہوئے وہاب ریاض کا ریکارڈ توڑ دیا ہے اور لیگ کی تاریخ میں سب سے زیادہ وکٹیں لینے والے بولر بن گئے ہیں۔
جمعہ کے روز پی ایس ایل 10 کے ایک اہم میچ میں کراچی کنگز اور کوئٹہ گلیڈی ایٹرز کا آمنا سامنا ہوا۔ کراچی میں کھیلے گئے اس میچ میں میزبان ٹیم نے پہلے بیٹنگ کرتے ہوئے 7 وکٹوں کے نقصان پر 175 رنز بنائے۔
ہدف کے تعاقب میں کوئٹہ گلیڈی ایٹرز مقررہ 20 اوورز میں 9 وکٹوں کے نقصان پر صرف 119 رنز بنا سکے اور یوں کراچی کنگز نے یہ میچ 56 رنز سے جیت لیا۔
اس میچ میں کراچی کے فاسٹ بولر حسن علی نے شاندار کارکردگی دکھاتے ہوئے 3 کھلاڑیوں کو آؤٹ کیا۔ انہی وکٹوں میں سے ایک، حسن نواز کو صرف ایک رن پر آؤٹ کر کے حسن علی نے وہاب ریاض کا ریکارڈ توڑ دیا اور پی ایس ایل کی تاریخ کے سب سے زیادہ وکٹیں لینے والے بولر بن گئے۔
حسن علی اب تک 84 اننگز میں 116 وکٹیں حاصل کر چکے ہیں جبکہ اس سے قبل وہاب ریاض نے 87 اننگز میں 113 وکٹیں لی تھیں۔
30 سالہ حسن علی پی ایس ایل 10 میں شاندار فارم میں ہیں اور اب تک صرف 3 میچز میں 8 وکٹیں لے چکے ہیں۔
یہ بھی قابل ذکر ہے کہ پی ایس ایل 10 میں کراچی کنگز نے 3 میں سے 2 میچ جیتے اور 1 ہارا ہے جس کے بعد ٹیم پوائنٹس ٹیبل پر 4 پوائنٹس کے ساتھ تیسرے نمبر پر موجود ہے۔
