گوگل نیوز پر ہمیں فالو کریںپنجاب کے شہر منڈی بہاؤالدین میں شادی کی تقریب کو غیر معمولی اور منفرد انداز میں منانے کے لیے دلہے کے دوست نے نجی جہاز کرائے پر لیا اور بارات کے دوران دلہن کے گھر پر لاکھوں روپے کی برسات کی۔
اس واقعے کی ویڈیو سوشل میڈیا پر وائرل ہو گئی ہے، جس پر مختلف آرا کا اظہار کیا جا رہا ہے۔ کچھ لوگوں نے اس منظر کو دلچسپ قرار دیا ہے جبکہ اکثر نے اسے دولت کے غیر ضروری دکھاوے اور فضول خرچی کی مثال قرار دیا۔
ایک صارف نے سوشل میڈیا پلیٹ فارم “ایکس” پر ویڈیو شیئر کرتے ہوئے طنزیہ انداز میں لکھا: “دلہے کے والد نے اپنے بیٹے کی شادی کے لیے جہاز کرائے پر لیا اور دلہن کے گھر پر لاکھوں روپے برسائے۔ لگتا ہے دلہا اپنی باقی زندگی والد کے قرضے اتارتے ہوئے گزارے گا۔”
ابتدائی اطلاعات میں کہا گیا تھا کہ یہ شاہ خرچی دلہے کے والد کی جانب سے کی گئی تھی اور واقعہ سندھ کے شہر حیدرآباد میں پیش آیا تھا۔
حیدرآباد ایکسپریس نے وضاحت کی کہ یہ واقعہ دلہے کے والد نہیں بلکہ اس کے دوست کی جانب سے کیا گیا اور ویڈیو منڈی بہاؤالدین پنجاب میں فلمائی گئی تھی۔
