الیکٹرانک ووٹنگ مشینوں پرحکومت اور الیکشن کمیشن جلد ایک پیج پر ہونگے، شیخ رشید

اسلام آباد: وفاقی وزیر داخلہ شیخ رشید احمد نے کہا ہے کہ الیکشن کمیشن آف پاکستان اور حکومت الیکٹرانک ووٹنگ مشینوں کے حوالے سے قریب آرہے ہیں اور اگلے انتخابات میں الیکٹرانک ووٹنگ مشینوں کے استعمال کے حوالے سے اچھی خبر ملے گی۔

اسلام آباد میں پریس کانفرنس سے خطاب کرتے ہوئے انہوں نے کہا کہ مسلم لیگ ن کو آنے والے دنوں میں اپنی صفوں میں مزید خرابیوں کا سامنا کرنا پڑے گا۔

انتخابات کے بارے میں مسلم لیگ (ن) کے صدر شہباز شریف کے بیان کا جواب دیتے ہوئے انہوں نے اس بات کی تصدیق کی کہ انتخابات منصفانہ اور شفاف ہوں گے کیونکہ یہ وزیراعظم کی رائے بھی تھی۔

مسلم لیگ (ن) کے صدر شہبازشریف کے 2023 کے انتخابات میں پی ٹی آئی کو سیاسی طور پر دفن کرنے کے دعوے کے بارے میں انہوں نے کہاکہ نماز پڑھو اور اپنی فکر کرو۔

وراثت کی لڑائی آپ کے خاندان میں شروع ہو چکی ہے اور یہ سوچیں کہ یہ لڑائی دو سال بعد کہاں جائے گی۔انہوں نے پیش گوئی کی کہ اندرونی تنازعات کی وجہ سے مسلم لیگ (ن) کے اندر تین دھڑے ہوں گے۔

مزید پڑھیں:کراچی سرکلر ریلوے سے شہریوں کی مشکلات کم ہو جائیں گی، اعظم سواتی

وزیر داخلہ نے کہا کہ ملک میں ای پاسپورٹ متعارف کرانے کا بھی فیصلہ کیا گیا ہے۔ انہوں نے کہا کہ فہرست میں مزید 15 ممالک کو شامل کرنے کی تجویز بھیجی گئی ہے جن کے شہریوں کو آمد پر ویزا فراہم کیا جائے گا جن میں امریکہ ، کینیڈا ، فرانس اور ایران شامل ہیں۔شیخ رشید نے کہا کہ نیوزی لینڈ کرکٹ ٹیم کے دورے کو منسوخ کرنے والوں کو جلد بے نقاب کیا جائے گا ۔