طبی ماہرین کا کہنا ہے کہ بعض سبزیاں ،پھل اور خشک میوہ جات جسمانی تکالیف یا بیماریوں کے علاج کے لیے دواؤں سے بہتر ثابت ہوتے ہیں۔ ایسے ہی 7 مسائل کے حل کے لیے پھلوں اور سبزیوں سے کن کن طریقوں سے مدد لی جاسکتی ہے، آئیے دیکھتے ہیں:
آنتوں کے کینسر کے لیے
آنتوں کا کینسر بہت خطرناک مرض ہے اور اس کی سب سے خطرناک بات یہ ہے کہ ایک بار جانے کے بعد یہ واپس بھی آسکتا ہے، لیکن اخروٹ ایک ایسا پھل ہے جس کو کھانے سے آنتوں کے کینسر کے خدشات کو بہت حد تک کم کیا جاسکتا ہے۔طبی ماہرین کے مطابق ہفتے میں 14 اخروٹ کھانےسے مرض دوبارہ لوٹنے کاخدشہ 44 فیصد کم کیا جاسکتا ہے۔
غذائی سپلیمنٹ
وٹامن اے، بی، سی ڈی اور ای کے حصول کے لیے سرخ شملہ مرچ، پالک، دالیں، لوبیا، مشروم، انڈے اور گاجروں کا استعمال بے حد مفید پایا گیا ہے۔ ان کی مدد سے دواؤں کے ذریعے لیے گئے غذائی سپلیمنٹ سے زیادہ وٹامن حاصل کیے جاسکتے ہیں۔
خون پیدا کرنے کے لیے
سرخ رنگت کے حامل پھل اور سبزیاں خون پیدا کرکے صحت کو چار چاند لگا دیتی ہیں۔ سبزیوں میں گاجر اور چقندر جبکہ پھلوں میں سیب، انار اور تربوز کے استعمال سے خون وافر مقدار میں پیدا ہوتا ہے جس کی مدد سے بیماریوں کے خلاف قوتِ مدافعت مضبوط ہوتی ہے۔
نظر کی تیزی کے لیے
سونف اور بادام کا استعمال نظر کے لیے بے حد مفید پایا گیا ہے۔ اگر نظر کمزور ہے یا دھندلا دکھائی دیتا ہے۔ دور یا قریب سے لکھی گئی عبارت کو پڑھنے میں مشکل یا تصاویر دیکھنے میں دقت ہوتی ہو تو سات بادام پیس کر آدھا آدھا چمچ سونف اور مصری کے ساتھ روزانہ استعمال کریں۔ اس سے نظر بہت جلد بہتر ہوگی ۔
وزن کم کرنے کے لیے
اگر وزن زیادہ ہوجائے تو اس سے بڑی پریشانی کی بات کوئی نہیں ہے، کیونکہ موٹاپا اوّل تو خود کسی بیماری سے کم نہیں ہے۔ انسان چلنے پھرنے میں دقت محسوس کرتا ہے اور خود اپنا بوجھ بھی اٹھانے کے لائق نہیں رہتا۔ اس کے لیے پسی ہوئی کلونجی آدھا چمچ ایک گلاس پانی میں اُبال لیں اور صبح و شام استعمال کریں۔ ایک گلاس پانی میں کلونجی کے تیل کے چار پانچ قطرے اور لیموں کا رس ڈال کر صبح و شام ایک مہینہ استعمال کریں۔ اس سے موٹاپے میں واضح فرق محسوس ہوگا۔
نزلہ زکام اور کھانسی کے لیے
ملٹھی کا استعمال کھانسی کے خلاف زود اثر پایا گیا ہے۔ نزلہ زکام اور کھانسی سے نجات کے لیے ملٹھی منہ میں رکھ کر چوسنے سے افاقہ اور آرام ملتا ہے۔ اس سے گلا صاف ہوتا ہے اور کھانسی سے ہونے والی شدید کوفت میں بھی کمی واقع ہوتی ہے۔
زخم اور سوجن کے لیے
اکثر ہم زخموں سے آرام کے لیے طرح طرح کے ٹوٹکے استعمال کرتے ہیں لیکن دیکھا گیا ہے کہ بعض زخم اتنی جلدی ٹھیک نہیں ہوتے اور سوج کر مزید تکلیف کا باعث بنتے ہیں۔ سوجن سے بچاؤ کے لیے اگر آپ پیاز کو جلا کر اس میں ہلدی کی آمیزش سے ایک لیپ تیار کرلیں اور اسے زخم پر لگائیں تو بہت جلد افاقہ ہوتا ہے۔