گوگل نیوز پر ہمیں فالو کریںمیانمار میں تقریبا دو ماہ پہلے آنے والے زلزلے کے نایاب وڈیو کلپ نے ماہرینِ ارضیات کو حیران کر دیا ہے۔ وڈیو میں 7.7 شدت کے زلزلے کے دوران زمین کی پرت کو پھٹتے اور سرکتے ہوئے براہِ راست دیکھا جا سکتا ہے۔
یہ زلزلہ 28 مارچ کو میانمار میں آیا جس کے نتیجے میں 3 ہزار 700 سے زیادہ افراد ہلاک اور ہزاروں زخمی ہوئے۔ زلزلے کی شدت 7.7 تھی اور اس کا مرکز زمین کی سطح سے محض 10 کلومیٹر گہرائی میں تھا۔ زلزلے کا اثر 460 کلومیٹر تک پھیلا، جس نے زمین کو چاک کرتے ہوئے کئی علاقوں کو 6 میٹر تک ایک دوسرے سے ہٹا دیا۔
یہ ویڈیو منڈلے شہر کے قریب سی سی ٹی وی کیمرے کی مدد سے ریکارڈ کی گئی، جس میں زمین کی سطح پر دراڑیں اور سرکاؤ کو براہِ راست دیکھا جا سکتا ہے۔ یہ پہلا موقع ہے کہ کسی زلزلے کے دوران زمین کی پرت کے پھٹنے اور سرکنے کا عمل اتنی واضح طور پر ریکارڈ ہوا ہے، جو ماہرین کے لیے انتہائی قیمتی ہے۔
اس ویڈیو میں زمین کی سطح پر دراڑیں واضح طور پر نظر آتی ہیں، جو زلزلے کے دوران زمین کی حرکت کو ظاہر کرتی ہیں۔ ماہرینِ ارضیات کے مطابق، یہ ویڈیو زلزلے کے اثرات کو بہتر طور پر سمجھنے اور مستقبل میں آنے والے زلزلوں کے لیے تیاری کرنے میں مددگار ثابت ہوگی۔
اس ویڈیو کو 11 مئی 2025 کوSagaing Earthquake Archive” ” یوٹیوب چینل پر اپ لوڈ کیا گیا تھا، اور اب تک اس ویڈیو کو ایک ملین سے زائد مرتبہ دیکھا جا چکا ہے۔ یہ ویڈیو نہ صرف ماہرینِ ارضیات کے لیے بلکہ عام افراد کے لیے بھی زلزلے کے اثرات کو سمجھنے کا ایک نادر موقع فراہم کرتی ہے۔
وڈیو پر تبصرہ کرنے والے افراد نے اسے خوف ناک اور طاقتِ فطرت کا کھلا اظہار قرار دیا۔ ایک ناظر نے کہا کہ اگر آپ نے وڈیو کو پہلی بار صرف ایک راستہ دیکھتے ہوئے دیکھا ہے، تو اسے دوبارہ مختلف زاویوں سے دیکھیں۔
