مصر کے الجیزہ چرچ میں آتشزدگی سے 41 افراد ہلاک، متعدد زخمی

قاہرہ: مصر کے شہر الجیزہ میں واقع چرچ میں مبینہ طور پر شارٹ سرکٹ سے ہونے والی آتشزدگی کے نتیجے میں 41 افراد ہلاک جبکہ متعدد زخمی ہو گئے ہیں۔ حکام کا کہنا ہے کہ زیادہ تر افراد کی ہلاکت بھگدڑ مچنے کے باعث ہوئی۔

تفصیلات کے مطابق الجیزہ شہر کے ضلع امبایا میں واقع ابوسفین چرچ میں گزشتہ روز آگ لگی جس کے نتیجے میں کم از کم 41 افراد ہلاک جبکہ 40 سے زائد زخمی ہوئے۔ ہلاک ہونے والے افراد میں بچے بھی شامل تھے۔

یہ بھی پڑھیں:

مستقبل کے چیلنجر پر قابو پانے کیلئے پر اعتماد ہیں۔پاکستان

بین الاقوامی خبر رساں ادارے روئٹرز کا کہنا ہے کہ اتوار کے روز کاپٹک ابوسفین چرچ میں 5000 افراد عبادت میں مصروف تھے جب آگ بھڑک اٹھی۔ آگ لگنے کی وجوہات پر تاحال تحقیقات جاری ہیں۔

آگ لگنے کے باعث چرچ کے داخلی راستے بند ہونے کے باعث جان بچانے کیلئے مسیحی برادری میں تشویش پھیل گئی۔ عبادت گاہ میں بھگدڑ مچنے کے باعث متعدد افراد روندے جانے کے باعث ہلاک ہو گئے۔

ریسکیو اداروں کا کہنا ہے کہ چرچ میں لگی ہوئی آگ پر قابو پالیا گیا ہے۔ امبایا کے علاقے میں ایک قریبی چرچ کے فادر فرید فاحمی کا کہنا تھا کہ بجلی گئی ہوئی تھی تو ہم نے جنریٹر چلالیا تاہم بجلی آنے پر اوور لوڈ ہوا۔

چرچ میں موجود عبادت گزاروں میں سے یاسر منیر کا کہنا تھا کہ لوگ تیسری اور چوتھی منزل پر اکٹھے ہونے لگے جبکہ دوسری منزل سے دھواں اٹھ رہا تھا۔ بھگدڑ مچنے کے باعث لوگ ایک دوسرے پر گر رہے تھے۔

مصر کی مسیحی برادری اکثر و بیشتر مختلف بیانات میں حکومت پر امتیازی سلوک کے الزامات لگاتی آئی ہے۔ یاسر منیر کا کہنا ہے کہ ہم سب سے نچلی منزل پر ہونے کے باعث  بچانے میں کامیاب رہے۔