گوگل نیوز پر ہمیں فالو کریںوزیر اعظم کی معاونِ خصوصی برائے اطلاعات و نشریات فردوس عاشق اعوان نے کہا ہے کہ مولانا فضل الرحمان کے مارچ کی بلی نواز شریف کی گفتگو کے بعد تھیلے سے باہر آگئی ہے اور ثابت ہو گیا کہ وہ کرپشن کنگز کے روزگار کو تحفظ دینے کے لیے نکلے ہیں۔
سماجی رابطے کی ویب سائٹ ٹوئٹر پر اپنے پیغام میں معاونِ خصوصی اطلاعات فردوس عاشق اعوان نے کہا کہ فضل الرحمان کا مارچ مظلوم کشمیریوں کی جدوجہد کو سپورٹ کرنے کے لیے نہیں بلکہ چوروں کی آزادی کے لیے ہے۔
یہ بھی پڑھیں: چین نے کشمیرکو متنازع مقدمہ قرار دے کر بھارتی مؤقف مسترد کردیا، فردوس عاشق اعوان
محمد نواز شریف کی گفتگو کے بعد فضل الرحمان کے مارچ کی بلی تھیلے سے باہر آگئی ہے۔ثابت ہوگیا کہ ان کا مارچ کشمیریوں کی آزادی کیلئے نہیں چوروں کی آزادی کیلئےہے۔ وہ مظلوموں اور بے کسوں کے لئے نہیں بلکہ کرپشن کنگز کے سیاسی و معاشی روزگار کو تحفظ دینے کے لیے باہر نکلے رہ ہیں۔
— Firdous Ashiq Awan (@Dr_FirdousPTI) October 12, 2019
فردوس عاشق اعوان نے کہا کہ نواز شریف اور شہباز شریف سمیع اللہ اور کلیم اللہ کا کھیل کھیل رہے ہیں جس کے دوران کبھی گیند شہباز شریف کے کورٹ میں چلی جاتی ہے تو کبھی نواز شریف کے پاس لیکن دونوں گول کرنے میں ناکام ہوچکے ہیں۔
انہوں نے کہا کہ مسلم لیگ کے قائدین شہباز شریف اور نواز شریف کے گول پوسٹ الگ الگ ہونے کے باعث وہ گول کرنے میں ناکامی کا سامنا کر رہے ہیں جبکہ آج ماڈل ٹاؤن میں اپوزیشن اجلاس بھی اسی کھیل کا ایک حصہ ہے۔
نواز شریف اور شہباز شریف سمیع اللہ اور کلیم اللہ کا کھیل کھیل رہے ہیں۔کبھی بال شہباز شریف کے پاس ہوتی ہے تو کبھی نواز شریف کے پاس۔تاہم دونوں گول کرنے میں ناکام ہیں کیونکہ دونوں کے گول پوسٹ الگ الگ ہیں۔آج ماڈل ٹاؤن میں ہونے والا اجلاس بھی اسی کھیل کا حصہ ہے۔
— Firdous Ashiq Awan (@Dr_FirdousPTI) October 12, 2019
دھرنے کے حوالے سے فردوس عاشق اعوان نے مولانا فضل الرحمان کو اسلام آباد لاک ڈاؤن نہ کرنے کا مشورہ دیتے ہوئے کہا کہ ہم جانتے ہیں کہ آپ سیاسی جلوے کے شیدائی ہیں جس کے حصول کے لیے یہ سب کیا جارہا ہے جبکہ آپ نے اندرونی اور بیرونی آقاؤں کی خوشنودی کے لیے بھارت کے خلاف یومِ سیاہ کے دن کو سیاست کے لیے چنا ہے۔
جانتے ہیں کہ فضل الرحمان سیاسی حلوے کے شیدائی ہیں جس کے حصول کیلئے اسلام آباد کو لاک ڈاؤن نہ کریں ۔ اندرونی اور بیرونی آقاؤں کی خوشنودی کیلئے بھارت کے خلاف یوم سیاہ کے دن کو سیاست کے لئے چنا گیا۔
— Firdous Ashiq Awan (@Dr_FirdousPTI) October 12, 2019
یاد رہے کہ اس سے قبل وزیر اعلیٰ خیبر پختونخواہ محمود خان نے کہا کہ ہماری کوشش ہو گی مولانا فضل الرحمان کے ساتھ کوئی نہ نکلے۔ مدرسے کے چھوٹے بچوں کو سیاست سے دور رکھنا ہو گا بچوں کے ذریعے سیاست نہیں ہونی چاہیے۔
انہوں نے کہا کہ خیبر پختونخوا سے مولانا فضل الرحمان کے ساتھ زیادہ لوگ شریک نہیں ہوں گے اور ہماری کوشش ہو گی کہ خیبر پختونخواہ سے کوئی نہ جا سکے۔ مولانا فضل الرحمان کے قافلے جب نکلیں گے تو صحیح تعداد کا اندازہ ہو گا لیکن وہ جو دعویٰ کر رہے ہیں 15 لاکھ کا اتنے لوگ وہ نہیں لا سکتے۔
مزید پڑھیں: کوشش ہو گی کے پی کے سے مولانا فضل الرحمان کے ساتھ کوئی نہ نکلے، محمود خان
