فنانشل ایکشن ٹاسک فورس کا اجلاس شروع ،پاکستان کے اقدامات پر غور

پیرس: ایف اے ٹی ایف کا اجلاس شروع ہو گیا جس میں دہشت گردی کی مالی امداد کے خاتمے کے لیے پاکستان کے اقدامات پر غور کیا جائے گا۔

فنانشل ایکشن ٹاسک فورس کا اجلاس شروع ہوگیا ہے تاہم پاکستان سے باضابطہ مذاکرات 14 اکتوبر سے پیرس میں شروع ہوں گے،اجلاس میں 200 سے زائد ممالک اور عالمی تنظیموں کے نمائندے شریک ہیں۔

اجلاس کے ایجنڈے میں منی لانڈرنگ اور دہشت گردی کی مالی امداد سمیت کئی نکات شامل ہیں۔ اجلاس میں پاکستان کے وفد کی سربراہی حماد اظہر کررہے ہیں۔ایف اے ٹی ایف پاکستان کے اقدامات سے مطمئن ہوئی تو ’گرے ایریا‘ سے خارج کرنے کی کارروائی کا آغاز ہوسکتا ہے

پاکستان نے نئی نیشنل رسک اسیسمنٹ اسٹڈی مکمل کرکے رپورٹ بھجوائی تھی جس میں دہشت گردی کی مالی معاونت اور دہشت گردی کے خطرات کے حوالے سے 12 سے زائد صفحات شامل ہیں۔ رپورٹ میں کالعدم تنظیموں کے خلاف کارروائیوں اور استغاثہ سے متعلق آگاہ کیا گیا ہے۔