وفاقی حکومت نے کورونا وائرس کو سنگین مسئلے کے طور پر نہیں لیا، جام اکرام اللہ دھاریجو

کراچی :سندھ کے وزیر صنعت و تجارت اور محکمہ امداد باہمی و انسداد بدعنوانی جام اکرام اللہ دھاریجو نے وفاقی حکومت پر تنقید کرتے ہوئے کہا ہے کہ وزیر اعلی سندھ سید مراد علی شاہ کے بار بار نشاندھی کرنے کے باوجود وزیر اعظم عمران خان نے کرونا وائرس کے مسئلے سے نمٹنے کے لئے کوئی سنجیدہ اقدام نہیں اٹھایا۔

یہاں تک کہ انہوں نے وزیراعلیٰ سندھ کی ٹیلی فون کال بھی اٹھانے کی زحمت گوارا نہیں کی اور وزیر اعظم عمران خان اور ان کی ٹیم کی نااہلی پاکستان میں کورونا وائرس پھیلانے کا سبب بنی جمعرات کو یہاں جاری ایک بیان میں انہوں نے کہا کہ یورپ اور امریکہ کورونا وائرس کے خلاف برسرپیکار ہیں اور حکومت سندھ اپنے وسائل میں رہتے ہوئے اس مہلک وائرس کے ممکنہ پھیلاؤ کو روکنے کے لئے ہر ممکن قدم اٹھا رہی ہے لیکن یہ کہتے ہوئے افسوس ہوتا کہ وفاقی حکومت گذشتہ ایک ماہ سے خواب خرگوش کے مزے لے رہی ہے۔

انہوں نے مزید کہا کہ وزیراعلیٰ سندھ کرونا وائرس کے سنگین مسئلے کی طرف وفاقی حکومت کی توجہ مبذول کروانے کی پوری کوشش کر رہے ہیں لیکن اس مسئلے پر کوئی توجہ نہیں دی گئی اور مسافروں / زائرین کی مناسب جانچ پڑتال سرحدی چوکیوں اور ہوائی اڈوں پر نہیں کی گئی جو کلی طور پر وفاقی حکومت کی ذمہ داری ہے۔

مزید پڑھیں:کورونا وائرس: حکومت سندھ کا ایکسپو سینٹر میں فیلڈ اسپتال کے قیام کا منصوبہ

صوبائی وزیر جام اکرام اللہ دھاریجو نے کہا کہ عوام کو وزیر اعظم عمران خان کی تقریر سے امدادی پیکیج اور احتیاطی تدابیر کی توقع تھی لیکن یہ خطاب سراسر مایوس کن اور وقت کا ضیاع تھا۔ انہوں نے کہا کہ وفاقی حکومت کی ناقص کارکردگی اور نااہلی کی وجہ سے ، تفتان میں قرنطین مراکز پاکستان میں کورونا وائرس پھیلانے کی نرسری بن گئے اور یہ پورے ملک میں پھیل گیا۔

سندھ میں بازاروں ، ہوٹلوں اور دفاتر وغیرہ میں جزوی طور پر لاک ڈاؤن کے بارے میں انہوں نے کہا کہ ہمارے پاس کوئی چارہ نہیں تھا اور اگر ہم اپنے لوگوں کو بچانا چاہتے ہیں تو ہمیں سخت اقدامات اٹھانا پڑیں گے۔

انہوں نے مزید کہا کہ اس مسئلے پر جلد یا بدیر وفاقی حکومت کو سندھ حکومت کی مثال پر عمل کرنا پڑے گا۔ جام اکرام اللہ اللہ دھاریجو نے کہا کہ کورونا وائرس کے معاملے پر امریکی صدر ٹرمپ نے اپوزیشن جماعتوں سے رابطہ کیا لیکن ہمارے وزیر اعظم کے پاس اس معاملے پر حکومت سندھ سے رابطہ کرنے کا وقت نہیں ہے۔

صوبائی وزیر جام اکرام اللہ دھاریجو نے کہا کہ پاکستان پارٹی کے چیئرمین بلاول بھٹو زرداری اور وزیراعلیٰ سندھ سید مراد علی شاہ کی ہدایت پر کورونا وائرس سے نمٹنے کے لئے ایک بہت بڑا فنڈ مختص کیا گیا ہے تاکہ اس مسئلے نمٹنے میں آسانی رہے۔