گوگل نیوز پر ہمیں فالو کریںوفاقی دارالحکومت اسلام آباد میں آج وفاق کے زیرِ انتظام سرکاری اداروں میں ملازمت کرنے والے شہریوں نے تنخواہوں میں اضافے کیلئے احتجاج کیا جس کے دوران پولیس پر پتھراؤ بھی کیا گیا۔
اسلام آباد میں آج اس احتجاج کے دوران اور بعد میں کیا ہوا؟ وزیرِ داخلہ شیخ رشید احمد نے کیا کہا؟ اور من حیث القوم احتجاج کرتے ہوئے اور حکمران کی حیثیت سے عوام کو ان کا حق دیتے ہوئے رویہ کیا ہونا چاہئے؟ آئیے جاننے کی کوشش کرتے ہیں۔
سرکاری ملازمین کا احتجاج
شہرِ اقتدار اسلام آباد آج میدانِ جنگ بن گیا کیونکہ پولیس اور تنخواہوں میں اضافے کیلئے احتجاج کرنے والے سرکاری ملازمین کے درمیان جھڑپیں ہوئیں۔ ملازمین نے ریلی نکالی اور پارلیمنٹ ہاؤس کے باہر دھرنا دینے کیلئے بھی سرتوڑ کوشش کی۔
وزیرِ اعظم عمران خان کی سربراہی میں چلنے والی پی ٹی آئی حکومت کے خلاف خوب نعرے بازی ہوئی۔ اس دوران پولیس سرکاری ملازمین پر ٹوٹ پڑی جس نے ملازمین پر آنسو گیس کی شدید شیلنگ کی، لیکن دوسری جانب ملازمین بھی منتشر نہیں ہوئے۔
ملازمین نے آنسو گیس کی شیلنگ کا جواب پتھراؤ سے دیا۔ سیکرٹریٹ چوک میں خوب لڑائی ہوئی۔ مظاہرہ کرنے والے درجنوں سرکاری ملازمین اور رہنماء حراست میں لے لیے گئے۔
شبلی فراز کی آمد
وزیرِ اطلاعات شبلی فراز اپنی گاڑی میں اسی علاقے سے گزرنے لگے تو کابینہ ڈویژن کے ملازمین نے گاڑی روک کر مطالبہ کیا کہ گرفتار کیے گئے رہنماؤں کو فوری رہا کیا جائے۔
یہی نہیں، بلکہ فیڈرل ڈائریکٹریٹ ایجوکیشن ملازمین نے تو سری نگر مین ہائی وے دونوں طرف سے ٹریفک کیلئے بند کردی۔ اسلام آباد میں شدید ٹریفک جام ہوگیا۔شہریون کو آمدورفت میں خاصی مشکلات کا سامنا رہا۔ اس دوران سرکاری امور ٹھپ ہو کر رہ گئے۔
مظاہرے کی وجہ؟
ایسا نہیں کہ حکومت نے ملازمین کی تنخواہوں میں اضافہ نہیں کیا تاہم مظاہرے کی اصل وجہ یہ تھی کہ سرکاری ملازمین کی تنخواہوں میں اضافہ توقع سے کم کیا گیا۔ گریڈ 1 سے 16 تک تنخواہوں میں 24 فیصد اضافے کی منظوری دی گئی۔
تاہم وفاقی ملازمین نے مطالبہ کیا کہ تنخواہوں میں 40 فیصد تک اضافہ کیا جائے اور یہ اضافہ صرف وفاق تک محدود نہ ہو بلکہ صوبائی سرکاری ملازمین کی تنخواہیں بھی 40 فیصد کی شرح سے ہی بڑھائی جائیں۔
دوسری جانب وفاقی حکومت کا کہنا تھا کہ صوبائی ملازمین 18ویں ترمیم کے اطلاق کے ساتھ ہی ہمارے دائرۂ اختیار سے باہر ہیں۔ کابینہ ڈویژن، سیکرٹریٹ، کوہسار کمپلیکس اور تمام وزارتوں کے سرکاری ملازمین دفتر نہیں گئے اور تمام تر سرکاری کام تعطل کا شکار رہے۔
شیخ رشید احمد کا اعلان
جب سرکاری ملازمین احتجاج کر رہے تھے، وزیرِ داخلہ شیخ رشید احمد بھی تمام تر صورتحال کو بغور دیکھ رہے تھے۔ شیخ رشید احمد نے اس حوالے سے اپنے بیان میں کہا کہ ہم وفاقی سرکاری ملازمین کی تنخواہوں میں فوری طور پر 40 فیصد اضافہ کر رہے ہیں۔
وزیرِ داخلہ شیخ رشید احمد نے کہا کہ 95 فیصد ملازمین کی تنخواہوں میں اضافہ کیا جارہا ہے۔ میڈیا کو بھی بلایا گیا تاکہ نوٹیفیکیشن بھی جاری ہوسکے۔ 16 گریڈ تک کے ملازمین کے حوالے سے بات چیت جاری تھی کہ ملازمین کی طرف سے 22 گریڈ تک تنخواہوں میں اضافے کا مطالبہ سامنے آگیا۔
انہوں نے کہا کہ 17 سے 22 گریڈ کے درمیان بہت بڑا فرق پیدا ہوجاتا ہے۔ مرکزی ملازمین 95 فیصد ہیں۔ 3 لاکھ 73 ہزار افراد کی تنخواہیں اوسطاً 40 فیصد تک بڑھا دی جائیں گی لیکن مظاہرین کا مطالبہ ہے کہ 5 فیصد مزید کی بھی تنخواہیں بڑھائی جائیں۔ یہ اربوں روپے کا معاملہ ہے جبکہ ہم صوبوں کو اس حوالے سے حکم نہیں دے سکتے۔
گزشتہ روز کیا ہوا تھا؟
کابینہ وفاقی سیکرٹریٹ ملازمین کی تنخواہوں میں اضافے کے حوالے سے گزشتہ روز کسی حتمی فیصلے تک نہ پہنچ سکی۔ ملازمین کے نمائندوں اور شیخ رشید کے مابین فالو اپ میٹنگ بھی ہوئی جو بے نتیجہ ثابت ہوئی۔
سرکاری ملازمین نے اس کے بعد سے ہی ہڑتال اور پی ڈی ایم کی حمایت سے دھرنا دینے کا فیصلہ کیا۔ ملازمین کی بڑی تعداد نیشنل پریس کلب کے باہر اور ڈی چوک پر بھی جمع ہوگئی۔
شہری انتظامیہ نے خبردار کیا کہ اگر مظاہرین نے املاک کو آگ لگانے یا گاڑیاں توڑنے کی کوشش کی تو ان کے خلاف قانون حرکت میں آجائے گا۔ سڑکیں بند کرے پر عدالتِ عظمیٰ کا حکم موجود ہے۔ مظاہرین کو احتجاج کیلئے جگہ دینے کی پیشکش کرچکے ہیں۔بعد ازاں مظاہرین سے مذاکرات ہوئے اور سیکرٹریٹ میں آمدورفت کے متبادل راستے کھول دئیے گئے۔
پیپلز پارٹی کا مؤقف
پی پی پی کی سینئر رہنما و سینیٹر شیری رحمان نے سماجی رابطے کی ویب سائٹ ٹوئٹر پر آج اپنے پیغام میں کہا کہ اسلام آباد میدانِ جنگ بن گیا ہے۔ ملازمین پر امن احتجاج کر رہے تھے اور ان پر لاٹھی چارج اور شیلنگ کی گئی جو قابلِ مذمت ہے۔
شیری رحمان نے کہا کہ پی پی پی نے ملازمین کی تنخواہیں 125 فیصد بڑھائیں۔ تباہی سرکار آئے دن مہنگائی میں اضافہ کرتی ہے لیکن سرکاری ملازمین کی تنخواہوں میں اضافہ نہیں ہوسکتا۔ کیا یہ نیا پاکستان ہے؟
آج اسلام آباد میدان جنگ بن گیا ہے۔ ملازمین کے پر امن مظاہرے پر لاٹھی چارج اور شیلنگ قابل مذمت ہے۔ پیپلز پارٹی نے ملازمین کی تنخواہ میں 125 فیصد اضافہ کیا تھا، تباہی سرکار آئے دن قیمتوں میں اضافہ کرتی ہے لیکن سرکاری ملازمین کی تنخواہوں میں اضافہ نہیں کر سکتی-کیا یہ ہے نیا پاکستان؟ pic.twitter.com/0aTAd40hU4
— SenatorSherryRehman (@sherryrehman) February 10, 2021
