تحریکِ عدم اعتماد، اپوزیشن عوامی حمایت سے محروم ہے۔فواد چوہدری

اسلام آباد: وفاقی وزیرِ اطلاعات و نشریات فواد چوہدری نے کہا ہے کہ تحریکِ عدم اعتماد میں کامیابی کیلئے اپوزیشن عوامی حمایت سے محروم اور اراکینِ اسمبلی کی مطلوبہ تعداد سے عاری ہے۔

تفصیلات کے مطابق حال ہی میں وزیرِ اطلاعات فواد چوہدری نے پریس کانفرنس سے خطاب کرتے ہوئے کہا کہ اپوزیشن کی طرف سے تحریکِ عدم اعتماد لائے جانے کا کوئی امکان نہیں کیونکہ ان کی جانب سے صرف ٹائم لائن دی جارہی ہے۔

یہ بھی پڑھیں:

جماعتِ اسلامی کا کراچی میں بڑھتے ہوئے جرائم کے خلاف احتجاج کا اعلان

پریس کانفرنس سے خطاب کے دوران فواد چوہدری نے کہا کہ اپوزیشن جماعتیں مارچ سے سیاسی ماحول گرم کرنے کی کوشش میں مصروف تھیں اور صرف فیس سیونگ کیلئے تحریکِ عدم اعتماد کی باتیں کی گئیں۔ پی ڈی ایم کی صورتحال مایوس کن ہے۔

خطاب کے دوران وزیرِ اطلاعات و نشریات نے کہا کہ اپوزیشن کے پاس عوام کو دینے کیلئے کچھ نہیں۔ ان کی دو بڑی جماعتیں پی پی پی اور ن لیگ صرف کچھ علاقوں تک محدود ہوگئی ہیں۔ حکومت کا ساتھ دینے کیلئے اتحادی جماعتوں کے شکر گزار ہیں۔

وفاقی وزیر فواد چوہدری نے کہا کہ اپوزیشن جماعتیں ایک دوسرے کے ساتھ مخلص نہیں اور اپنے ذاتی مفادات کیلئے کوشاں ہیں۔ حکومت بلاول بھٹو کے راولپنڈی مارچ کا خیر مقدم کرے گی اور مارچ کی کل طاقت 100افراد کو چائے بھی پلائی جائے گی۔