فیصل واؤڈا کا پیٹرول کی قیمت جلد 200روپے فی لیٹر ہونے کا دعویٰ

پاکستان تحریکِ انصاف کے سابق رکنِ اسمبلی و وفاقی وزیر فیصل واؤڈا نے دعویٰ کیا ہے کہ پیٹرول کی قیمت جلد 200 روپے فی لیٹر ہوجائے گی۔

تفصیلات کے مطابق اپنے ایک بیان میں سابق وفاقی وزیر فیصل واؤڈا نے کہا کہ ملک بھر میں پیٹرول کے 1 لیٹر کی قیمت بہت جلد 200 روپے سے تجاوز کر جائے گی۔ اس کو ریکارڈ کا حصہ بنا لیں۔

یہ بھی پڑھیں:

کل سے الٹی میٹم دینے والا آج بنی گالہ جا کر سو گیا،مریم اورنگزیب

بیان میں سابق رکنِ قومی اسمبلی فیصل واؤڈا نے کہا کہ امریکی ڈالر کی قیمت بھی بہت جلد 225 روپے سے زائد ہوگی۔ امپورٹڈ حکومت نے ڈیڑھ ماہ میں ملک کا بھٹہ بٹھا دیا ہے۔ ان کو صرف بدعنوانی آتی ہے۔

تحریکِ انصاف کے رہنما فیصل واؤڈا نے پیٹرول کی قیمت میں اضافے کے متعلق کہا کہ امپورٹڈ حکومت نے ملک کو معاشی طور پر تباہ کردیا، ن لیگ حکومت بتائے کہ قوم کو اس ظلم اور بربریت کا حساب کون دے گا۔ 

یاد رہے کہ اس سے قبل حکومت کی جانب سے جاری پیٹرولیم مصنوعات کی قیمتوں میں اضافے کے نوٹیفیکیشن کے بعد آج صبح سے اسٹاک ایکسچینج میں بھی بہتری نظر آنے لگی۔ 

پاکستان اسٹاک ایکسچینج میں آج کاروباری دن کے آغاز کے پہلے گھنٹے میں 800 سے زائد پوائنٹس کااضافہ ہوا،  کے ایس ای 100 انڈیکس میں صبح  کے وقت 894.75 پوائنٹس کا اضافہ ہوا، جو 42,909.80 پوائنٹس کی سطح پر پہنچ گیا۔