فیصل واؤڈا نے نااہلی کے فیصلے کو اسلام آباد ہائیکورٹ میں چیلنج کردیا

اسلام آباد :پاکستان تحریک انصاف کے رہنما فیصل واؤڈا نے الیکشن کمیشن آف پاکستان کی جانب سے تاحیات نااہلی کے فیصلے کو اسلام آباد ہائی کورٹ میں چیلنج کر دیا۔

سابق سینیٹر نے اپنی درخواست میں کہا ہے کہ الیکشن کمیشن کو نااہلی کا فیصلہ کرنے کا اختیار نہیں ہے۔

اس سے قبل الیکشن کمیشن نے پی ٹی آئی کے سینیٹرفیصل واؤڈا کو 2018 کے عام انتخابات کے دوران دہری شہریت چھپانے پر تاحیات نااہل قرار دے دیا تھا۔

مزید پڑھیں:ہم ساتھ ہیں، وزیراعظم صاحب آپ نے گھبرانا نہیں ، مونس الٰہی

چند روز قبل چیف الیکشن کمشنر سکندر سلطان راجہ کی سربراہی میں تین رکنی بنچ نے اپنا محفوظ کیا ہوا فیصلہ سناتے ہوئے پی ٹی آئی رہنما کو ہدایت کی تھی کہ وہ دو ماہ میں بطور رکن قومی اسمبلی وصول کی گئی تنخواہ اور دیگر مراعات واپس کریں۔

الیکشن کمیشن نے 10 مارچ کو سینیٹ کے انتخابات میں واؤڈا کے ووٹ کو بھی غلط قرار دیا تھا۔

واضح رہے کہ پاکستان پیپلز پارٹی کے رکن قومی اسمبلی قادر خان مندوخیل، میاں فیصل اور میاں آصف محمود نے فیصل واؤڈا کے خلاف درخواست دائر کی تھی جس میں موقف اختیار کیا گیا تھا کہ دہری چھپانے پر فیصل واؤڈا صادق اور امین نہیں رہے۔