فیصل واؤڈا نے تاحیات نااہلی کا فیصلہ سپریم کورٹ میں چیلنج کردیا

اسلام آباد: پاکستان تحریک انصاف کے رہنما اور سابق وفاقی وزیر فیصل واوڈا نے بطور سینیٹر اپنی تاحیات نااہلی کے فیصلے کو سپریم کورٹ میں چیلنج کردیا ہے۔

تفصیلات کے مطابق اسلام آباد ہائیکورٹ نے فیصل واؤڈا کی اپیل مسترد کردی تھی، ہائیکورٹ نے 2018 کے عام انتخابات میں حصہ لینے کے دوران اپنی دوہری شہریت چھپانے کے باعث الیکشن کمیشن کے تاحیات نااہلی کے فیصلے سے اتفاق کیا تھا۔

یہ بھی پڑھیں:

پاک جرمنی تعلقات کو 70سال مکمل، اسٹیٹ بینک نے یادگاری سکہ جاری کردیا

اپنے وکیل کے توسط سے سپریم کورٹ میں جمع کرائی گئی درخواست میں فیصل واؤڈا نے استدلال کیا کہ کمیشن کو کسی بھی سیاستدان کو تاحیات نااہل قرار دینے کا اختیار نہیں کیونکہ الیکشن کمیشن عدالت نہیں ہے۔

سپریم کورٹ میں دی گئی درخوست میں فیصل واڈا نے کہا کہ  اسلام آباد ہائیکورٹ نے  نااہلی کے خلاف ان کی درخواست کو جلد بازی میں خارج کر دیا اوراستدعا کی کہ سپریم کورٹ الیکشن کمیشن کے فیصلے کو کالعدم قرار دے۔ 

چیف الیکشن کمشنر فیصل سلطان راجہ کی سربراہی میں ای سی پی کے ایک بینچ نے 9 فروری کو واوڈا کو ان کی دوہری شہریت چھپانے پر نااہل قرار دیا تھا اور انہیں ہدایت کی تھی کہ وہ بطور وزیر اور ایم این اے وصول کی گئی تنخواہ اور دیگر مراعات واپس کریں۔

فیصل واؤڈا کو دی گئی مراعات اور تنخواہ 2 ماہ کے اندر واپس کرنے کا وقت دیا گیا ہے۔ بعد ازاں بطور سینیٹر فیصل واؤڈا کو ڈی نوٹیفائی بھی کردیا گیا۔ الیکشن کمیشن نے 9 مارچ کے روز فیصل واؤڈا کی خالی کی گئی نشست پر الیکشن کا اعلان کردیا ہے۔