گوگل نیوز پر ہمیں فالو کریںاسلام آباد ہائیکورٹ حملہ کیس میں ڈسٹرکٹ بار اسلام آباد کے سابق صدر ملک ظفر کھوکھر کو حراست میں لے لیا گیا ہے جس پر وکلاء نے آج احتجاج کا اعلان کردیا۔
تفصیلات کے مطابق پولیس نے ڈسٹرکٹ بار اسلام آباد کے سابق صدر ملک ظفر کھوکھر کو گرفتار کر لیا جنہیں ہائیکورٹ حملہ کیس میں نامزد کیا گیا تھا۔
ہائیکورٹ نے ملک ظفر کھوکھر کو توہینِ عدالت کا شوکاز نوٹس بھی جاری کیا تھا۔ ملک ظفر کھوکھر کو آج مقامی عدالت میں پیش کیا جائے گا جس پر وکلاء سراپا احتجاج ہیں۔
آج اسلام آباد بار کونسل نے ضلع کچہری سے لے کر ڈی چوک تک مارچ کا اعلان کیا ہے۔ وکلاء ساتھیوں کی رہائی اور گرائے گئے چیمبرز کی تعمیرِ نو کا مطالبہ کریں گے۔
یاد رہے کہ اِس سے قبل اسلام آباد ہائی کورٹ پر حملہ اور توڑ پھوڑ کرنے کے الزام میں پولیس نے ہائی کورٹ کے سیکورٹی انچارج کی مدعیت میں 34 وکلاء کے خلاف مقدمہ درج کرلیا۔
اعلامیے کے مطابق جن وکلاء کے خلاف 5 روز قبل توڑ پھوڑ کا مقدمہ درج کیا گیا ان کے خلاف توہین عدالت کی کارروائی کے لائسنس کی معطلی کے لئے اسلام آباد بار سے بھی رجو ع کرنے کا فیصلہ کیا گیا۔
مزید پڑھیں: اسلام آباد ہائیکورٹ میں توڑپھوڑ، 34 وکلاء کے خلاف مقدمہ درج
