کورونا وائرس کے معاملے پر سیاست نہ کی جائے، وزیراعظم عمران خان

اسلام آباد : وزیراعظم عمران خان نے قومی قیادت سے ملک میں جاری ناول کورونا وائرس کی وباء کے حوالے سے سیاست نہ کرنے کی اپیل کی ہے۔

وزیراعظم عمران خان نے اسلام آباد میں وفاقی کابینہ کے اجلاس کی صدارت کی،اجلاس میں کورونا وائرس کیس سے متعلق سپریم کورٹ کے فیصلے کا جائزہ لیا گیا۔

وزیراعظم کے مشیر برائے پارلیمانی امور ڈاکٹر بابر اعوان نے وزیر اعظم کو سپریم کورٹ کے فیصلے پر بریفنگ دی۔ اس موقع پر وزیراعظم عمران نے کہا کہ حکومت سپریم کورٹ کے فیصلوں پر بامقصد عملدرآمد کو یقینی بنائے گی۔

وفاقی کابینہ کے اجلاس میں صوبوں میں پانی کی مساوی تقسیم کے لئے ٹیلی میٹر کی تنصیب کی بھی منظوری دی گئی۔

عمران خان نے وزیر آبی وسائل فیصل واوڈا کے اقدامات کی تعریف کرتے ہوئے کہا کہ پانی کی مساوی تقسیم فوری طور پر ضروری ہے ، انہوں نے مزید کہا کہ وزارت آبی وسائل کو اس معاملے کو منطقی انجام تک پہنچانا چاہئے۔

ٹڈی دل کے بڑھتے ہوئے خطرات کے بارے میں بات کرتے ہوئے انہوں نے کہا کہ حکومت اس سے نمٹنے کے لئے پوری طرح تیار ہے ، انہوں نے مزید کہا کہ ہم نے فوری اور بروقت کاروائیاں کیں۔

مزید پڑھیں: کورونا حکمرانوں کے گھر تک پہنچ گیا، وزیراعظم ہاؤس کے 4 ملازمین میں وائرس کی تصدیق

انہوں نے قومی قیادت سے اپیل کی ہے کہ کورونا وائرس کے کے معاملے پر سیاست نہ کریں بلکہ اس مشکل گھڑی میں ایک آواز بن کر حکومت کا ساتھ دیں۔