گوگل نیوز پر ہمیں فالو کریںفلسطینی مزاحمتی تنظیم اور غزہ کی حکمران جماعت حماس نے 7 اکتوبر ہفتہ کے روز اسرائیل پر اچانک بڑے حملے کرکے اسرائیل سمیت پوری دُنیا کو حیران کردیا، ہفتے کے روز شروع ہونے والی یہ لڑائی اب تک جاری ہے۔
حماس کے حملوں کے بعد امریکہ اور بھارت اسرائیل کے حمایتی بن کر سامنے آئے ہیں جبکہ پاکستان سمیت دنیا بھر کے نامور فنکار اور مشہور شخصیات فلسطین اور اسرائیل کے حق میں اپنی آواز بُلند کرتے نظر آرہے ہیں۔
لیکن مغربی دُنیا کے زیادہ تر فنکار اسرائیلی عوام کے لیے اپنے دُکھ کا اظہار کررہے ہیں۔ ایسے میں عالمی شہرت یافتہ گلوکار جسٹن بیبر نے اسرائیل کی حمایت کرنے کیلئے سوشل میڈیا کا رُخ کیا تو وہ کشمکش کا شکار نظر آئے۔
گلوکار نے اپنی انسٹاگرام اسٹوری میں فلسطین کے شہر غزہ میں جاری بمباری کی تصویر پوسٹ کرکے اسرائیل کی حفاظت کے لیے دُعا کی۔
گلوکار کی یہ انسٹا اسٹوری سوشل میڈیا کے مختلف پلیٹ فارمز پر جیسے ہی وائرل ہوئی تو جسٹن بیبر نے اپنے انسٹاگرام ہینڈل سے اسٹوری ڈیلیٹ کردی۔
بعدازاں جسٹن بیبر نے ایک اور انسٹاگرام اسٹوری پوسٹ کی جس میں اُنہوں نے تصویر کے بغیر اسرائیل کے لیے دُعا کی۔
واضح رہے کہ انسٹا اسٹوری کی وجہ سے جسٹن بیبر سماجی رابطے کی ویب سائٹ ایکس پر ٹرینڈ کررہے ہیں، صارفین کا کہنا ہے کہ دراصل، گلوکار بھی فلسطین کے لیے افسردہ ہیں لیکن وہ اپنی شہرت کی وجہ سے فلسطینی مظلوموں کے لیے آواز نہیں اُٹھاسکتے۔
