سی این جی سیکٹر کو سردیوں میں گیس کی فراہمی بند کرنے کا فیصلہ

اسلام آباد:حکومت کی جانب سے سی این جی سیکٹر کو سردیوں میں گیس کی فراہمی بند کرنے کا فیصلہ کرلیا ہے۔

اس حوالے سے کابینہ توانائی برائے کمیٹی کے اجلاس کا انعقاد کیا گیا، اجلاس میں سردیوں کیلئے گیس لوڈ مینجمنٹ پلان کی طلب سے متعلق تجاویز منظور کی گئیں جبکہ کیپٹو پاور کو بھی گیس کی فراہمی بند کرنے کا فیصلہ کیا گیا جبکہ کٹوتی والی گیس گھریلو صارفین کو فراہم کی جائے گی۔

کابینہ توانائی کمیٹی کاوفاقی وزیر اسد عمر کی زیر صدارت اجلاس منعقد کیا گیا، جس میں پیٹرولیم ڈویژن نے سردیوں کیلئے گیس لوڈ مینجمنٹ پلان پیش کیا۔

توانائی کمیٹی نے سردیوں کیلئے گیس لوڈ مینجمنٹ پلان کی طلب سے متعلق تجاویز منظور کرتے ہوئے گیس کی رسد سے متعلق تجاویز آئندہ اجلاس میں دوبارہ پیش کرنے کی ہدایت کی ہے۔

اسد عمر کی زیر صدارت اجلاس میں فیصلہ کیا گیا کہ ایکسپورٹ انڈسٹری کو گیس کی فراہمی جاری رکھی جائے گی جبکہ گیس کی فراہمی یقینی بنانے کے لئے گیس پریشر مینجمنٹ پلان اپنایا جائے گا۔

اجلاس میں سردیوں میں سی این جی سیکٹر اور کیپٹو پاور کو گیس کی فراہمی بند کرنے کا فیصلہ کیا گیا جبکہ لوڈ مینجمنٹ پلان میں صنعتی سرگرمیوں کو ترجیح دی جائے گی۔

اس حوالے سے ترجمان کا کہنا ہے کہ مختلف شعبوں کیلئے گیس کی کٹوتی کی جائیگی اور کٹوتی والی گیس کی گھریلو صارفین کو فراہمی یقینی بنائی جائے گی۔

مزید پڑھیں: صنعتوں کو تباہی سے بچانے کیلئے گیس فراہم کی جائے ،زبیر موتی والا

واضح رہے کہ سردیوں میں گیس کے بحران کے حوالے سے پہلے آگاہ کیا جاچکا ہے، اب جبکہ سردیوں کی آمد ہے، توائی کمیٹی کے اجلاس میں اس حوالے سے اہم فیصلے کئے گئے۔