گوگل نیوز پر ہمیں فالو کریںکراچی:شہر قائد میں جاری غیر قانونی چارجڈ پارکنگ اور اضافی فیس وصولی کیخلاف سندھ ہائیکورٹ میں گلوبل فاؤنڈیشن کی درخواست پر جسٹس حسن اظہر رضوی کی سربراہی میں جسٹس راشد ہ اسد پر مشتمل دو رکنی بینچ نے سماعت کی، درخواست گزار احمد داؤد نے کہا کہ شہر بھر میں جگہ جگہ غیر قانونی چارجڈ پارکنگ ایریا بنادیے گئے ہیں۔ مختلف علاقوں میں شہریوں سے من مانی پارکنگ فیس کی وصولی ہورہی ہے،موٹر سائیکل چارجڈ پارکنگ فیس 10روپے کے بجائے30روپے جبکہ کار پارکنگ فیس 20روپے کے بجائے 50روپے تا100روپے تک وصول کی جارہی ہے۔
بلدیاتی اداروں اور پولیس کی مبینہ سرپرستی میں غیرقانونی چارجڈ پارکنگ کا کاروبار اپنے عروج پر ہے، پارکنگ مافیا کو رقم نہ دی جائے تو سنگین نتائج کی دھمکیاں دی جاتی ہے۔ شہری اگر کسی بازار میں اپنی فیملی کے ہمراہ آئے اور پارکنگ فیس ادا کرنے سے انکار کرے تو مافیا کے کارندے پولیس کی ملی بھگت گاڑیاں لفٹ کروادیتے ہیں۔
ڈائریکٹر چارجڈ پارکنگ جنوبی کو متعدد بار شکایات کی ہے کہ ساؤتھ زون میں شامل علاقے ایم اے جناح روڈ، کھارادر، صدر، کلفٹن، بولٹن مارکیٹ، ٹاور، جامع کلاتھ، بوٹ بیسن، سمیت تمام چھوٹی بڑی مارکیٹوں کے باہر پارکنگ مافیا قابض ہوچکے ہیں اور اضافی رقم شہریوں سے وصول کررہے ہیں لیکن ڈی ایم سی جنوبی کی جانب سے کوئی کارروائی عمل میں نہیں آتی۔
عدالت نے ڈی ایم سی جنوبی سے استفسار کیا کہ پارکنگ کی رقم کہاں خرچ ہوتی ہے؟ ڈی ایم سی جنوبی کے وکیل نے کہا کہ یہ تمام رقم سڑکوں کی مرمت میں لگائی جاتی ہے، جس پر عدالت نے سخت براہمی کا اظہار کرتے ہوئے کہا کہ سڑکیں ٹوٹ پھوٹ کا شکار ہوگئی ہیں۔
ایم اے جناح روڈ، صدر کے تمام بازار اور اسکے اطراف ڈبل ٹرپل لائن پارکنگ ہوتی ہے، کوئی چیک کرنا والا نہیں ہے،جگہ جگہ ٹریفک جام رہتا ہے، کچرے کا انبار لگ چکا ہے، ڈی ایم سی کا کام لگتا ہے صرف عوام سے پیسے بٹورنا ہے۔
عدالت نے وکیل ڈی ایم سی جنوبی سے استفسار کیا کہ کس قانون کے تحت یہ سب کام ہورہا ہے، جس پر ڈی ایم سی جنوبی نے خاموشی اختیار کرلی، عدالت نے سخت برہمی کرتے ہوئے کہا کہ پارکنگ کا آکشن کب ہوا تھا؟ پارکنگ سے سالانہ کتنا پیسہ ڈی ایم سی کے اکاؤنٹ میں جاتا ہے؟ ڈائریکٹر پارکنگ کے ایم سی اور ڈی ایم سی کہاں ہے؟ پارکنگ فیس کی وصولی کیلئے چھوٹے بچے لگا دیئے ہیں کوئی چیک کرنے والا نہیں ہے۔
مزید پڑھیں: سندھ ہائیکورٹ، کورنگی میں انسدادِ تجاوزات آپریشن کی رپورٹ طلب
