علاقائی امن کیلئے نائجیریا کا کردار قابلِ تحسین ہے۔آرمی چیف

راولپنڈی: آرمی چیف جنرل قمر جاوید باجوہ نے کہا ہے کہ علاقائی امن کیلئے نائجیریا کا کردار قابلِ تحسین ہے جبکہ پاکستان نائجیریا کو افریقہ میں اہم ریاست کے طور پر دیکھتا ہے۔

تفصیلات کے مطابق نائجیریا کے وزیر دفاع میجرجنرل بشیر صالحی نے آرمی چیف جنرل قمر جاوید باجوہ سے آرمی ہیڈ کوارٹرز میں ملاقات کی جس کے دوران باہمی دلچسپی، علاقائی سکیورٹی اور دو طرفہ تعاون کے فروغ پر گفتگو ہوئی۔

یہ بھی پڑھیں:

چینی ناظم الامورکی آرمی چیف سے ملاقات، علاقائی سلامتی پر تبادلہ خیال

نائجیریا کے وزیرِ دفاع سے ملاقات کے موقعے پر گفتگو کرتے ہوئے آرمی چیف نے کہا کہ پاکستان نائجیریا کو اہم افریقی ریاست کے طور پر دیکھتا ہے۔ خطے کے امن و امان کیلئے نائجیریا کا کردار قابلِ تعریف ہے۔

ملاقات کے دوران نائجیرین وزیرِ دفاع نے خطے میں قیامِ امن و استحکام کیلئے پاکستان کے کردار کی تعریف کی۔ انہوں نے آرمی چیف کو نائجیریا سے سفارتی تعاون کے فروغ کیلئے کردار ادا کرنے کی بھی یقین دہانی کرائی۔

پاک فوج کے شعبۂ تعلقاتِ عامہ (آئی ایس پی آر) کا کہنا ہے کہ آرمی چیف جنرل قمر جاوید باجوہ نے نائجیرین وزیر دفاع سے ملاقات کے دوران پاک نائجیریا تعلقات اور دو طرفہ تعاون کے فروغ سمیت دیگر امور پر بھی بات چیت کی۔

آئی ایس پی آر کا کہنا ہے کہ آرمی چیف نے جی ایچ کیو راولپنڈی میں ہونے والی ملاقات کے دوران برادر اسلامی ملک کے طور پر نائجیریا کی کاوشوں کی تعریف کی۔ دونوں ممالک کے مابین باہمی تعاون کو فروغ دینے کے عزم کا اعادہ کیا گیا۔