گوگل نیوز پر ہمیں فالو کریںاسلام آباد: چیئرمین سینیٹ صادق سنجرانی نے لیبیا میں سمندری طوفان سے جانی و مالی نقصان پر افسوس کا اظہار کرتے ہوئے کہا ہے کہ مصیبت کی اس گھڑی میں پاکستان لیبیا کے عوام کے ساتھ ہے۔
تفصیلات کے مطابق بدھ کو سینیٹ سیکرٹریٹ کی جانب سے جاری بیان میں چیئرمین سینیٹ صادق سنجرانی نے کہا کہ مصیبت کی اس گھڑی میں پاکستان کے عوام اور حکومت اپنے لیبیاکے بھائیوں کے ساتھ کھڑے ہیں۔اللہ تعالیٰ ایسی ناگہانی آفت سے سب کو محفوظ فرمائے۔
لیبیا میں سمندری طوفان سے 5000سےزائد شہری جاں بحق
لیبیا میں طوفان اور سیلاب کے نتیجے میں جاں بحق افراد کی بلندئ درجات اور لواحقین کے صبرِ جمیل کی دعا کرتے ہوئے چیئرمین سینیٹ نے کہا کہ لیبیا کے بہادر عوام روایتی عزم و ہمت سے اس ناگہانی آفت کا مقابلہ کریں گے جس کیلئے ہماری دعائیں ان کے ساتھ ہیں۔
چیئرمین سینیٹ صادق سنجرانی نے کہا کہ اقوامِ عالم ماحولیاتی تبدیلیوں کے باعث مشکلات کا شکار ہیں جس میں پاکستان بھی شامل ہے۔ موسمیاتی تغیرات کے اثرات کم کرنے کیلئے بین الاقوامی برادری کا تعاون اہمیت کا حامل ہے۔
خیال رہے کہ اس سے قبل لیبیا میں سمندری طوفان ڈینیل سے بڑے پیمانے پر تباہی پھیلی جس کے نتیجے میں اموات کی تعداد 5ہزار سے زائد جبکہ 10 ہزار کے لگ بھگ شہری لاپتہ ہو گئے۔ریسکیو کارروائیاں شروع کردی گئیں۔
ڈینیل نامی سمندری طوفان کے باعث درنہ شہر کی متعدد کالونیاں صفحۂ ہستی سے مٹ چکی ہیں، درنہ سمیت قریبی علاقے ڈیم ٹوٹنے کے باعث مزید تباہی سے دوچار ہوئے ہیں۔ لیبین حکام کا کہنا ہے کہ ہمیں فوری امداد درکار ہے۔
