سینٹرل ڈیولپمنٹ ورکنگ پارٹی نے جدید کراچی سرکلر ریلوے منصوبے کی منظوری دیدی

کراچی: سینٹرل ڈیولپمنٹ ورکنگ پارٹی نے کراچی سرکلر ریلوے کیلئے 273اعشاریہ 071 بلین روپے کے جدید منصوبے کی منظوری دے دی ہے۔

منصوبہ بندی کمیشن کے ڈپٹی چیئرمین ڈاکٹر جہانزیب خان کی زیر صدارت سی ڈی ڈبلیو پی کے اجلاس میں اس منصوبے کی منظوری دی گئی۔ کمیٹی نے اس منصوبے کو مزید غور کے لیے قومی اقتصادی کونسل کی ایگزیکٹو کمیٹی کو بھیج دیا۔

اجلاس میں ریلوے کے حکام، صوبائی حکومت کے نمائندوں اور دیگر متعلقہ اسٹیک ہولڈرز نے شرکت کی۔

مزید پڑھیں:کامیاب جوان پروگرام کے تحت نوجوانوں کو دکانیں فراہم کی جائیں گی، عثمان ڈار

سیکریٹری ریلوے نے کمیٹی کو aبریفنگ دی کہ منصوبے کے تحت 43 کلومیٹر کا دورویہ ٹریک اربن ریل ماس ٹرانزٹ سسٹم پبلک پرائیویٹ پارٹنرشپ کی بنیاد پر تین سال کی مدت میں تعمیر کیا جائے گا۔ اس منصوبے کا بنیادی مقصد میٹروپولیٹن شہر کراچی کو قابل اعتماد، محفوظ اور ماحول دوست پبلک ٹرانسپورٹ فراہم کرنا ہے۔

انہوں نے بتایا کہ اس پراجیکٹ سے یومیہ 457000 مسافروں کوسہولت ملے گی جو کہ یومیہ 10 لاکھ تک پہنچنے کی توقع ہے۔ منصوبے کے تحت کراچی کے سب سے زیادہ گنجان آباد علاقوں کو کوریڈور کے ساتھ ساتھ 30 اسٹیشن بنائے جائیں گے۔

پلاننگ کمیشن کے ڈپٹی چیئرمین نے کہا کہ منصوبے پر عمل درآمد ایک چیلنج ہے،ہمیں ریلوے میں سرمایہ کاری کرنے کی ضرورت ہے کیونکہ وفاقی حکومت ایسے مفاد عامہ کے منصوبوں کی حمایت کے لیے پرعزم ہے۔