گوگل نیوز پر ہمیں فالو کریںمریم نواز کے شوہر اور مسلم لیگ (ن) کے سینئر رہنما کیپٹن(ر) صفدر کو کراچی کے ہوٹل سے گرفتار کر لیا گیا جس کی پولیس نے تصدیق کی جبکہ ن لیگی قیادت گرفتاری پر شدید احتجاج کر رہی ہے۔
تفصیلات کے مطابق مریم نواز کا کہنا ہے کہ کیپٹن (ر) صفدر کو کراچی پولیس نے ہوٹل کے کمرے کا دروازہ توڑ کر گرفتار کیا جبکہ تھانہ بریگیڈ پولیس نے سابق وزیرِ اعظم نواز شریف کے داماد کیپٹن (ر) صفدر کی گرفتاری کی تصدیق کی ہے۔
پولیس ذرائع کا کہنا ہے کہ ڈی ایس پی جمشید ٹاؤن تصدیق وارث اور ایس ایچ او تھانہ بریگیڈ کیپٹن صفدر کی گرفتاری کیلئے ہوٹل پہنچے۔ پولیس پارٹی آج صبح تقریباً 6 بجے کیپٹن صفدر کو گرفتار کرنے کیلئے روانہ ہوئی تھی۔
ہوٹل سے گرفتاری کے بعد کیپٹن صفدر کو تفتیش کیلئے نامعلوم مقام پر منتقل کردیا گیا ہے جبکہ مریم نواز سمیت پاکستان مسلم لیگ (ن) کی اعلیٰ قیادت کیپٹن صفدر کی گرفتاری پر احتجاج میں مصروف ہے۔
یاد رہے کہ اِس سے قبل پاکستان مسلم لیگ (ن) کے سینئر مرکزی رہنما اور مریم نواز کے شوہر کیپٹن (ر) صفدر اور ن لیگ کے رکنِ صوبائی اسمبلی عمران خالد بٹ کے خلاف گوجرانوالہ میں بغاوت کا مقدمہ درج کیا گیا۔
گوجرانوالہ کے تھانہ سٹیلائٹ ٹاؤن میں 15 روز قبل سینئر ہاؤس آفیسر (ایس ایچ او) کی مدعیت میں درج بغاوت کے مقدمے میں مریم نواز کے شوہر کیپٹن (ر) محمد صفدر اور رکنِ اسمبلی عمران خالد بٹ ملزمان نامزد کیے گئے۔
مزید پڑھیں: سابق وزیرِ اعظم کے داماد کیپٹن صفدر کے خلاف بغاوت کا مقدمہ درج
