چیئرمین پی ٹی آئی سے اٹک جیل میں بشریٰ بی بی کی ملاقات

اٹک: چیئرمین پی ٹی آئی عمران خان سے اٹک جیل میں اُن کی اہلیہ بشریٰ بی بی کی ملاقات ہوئی ہے۔

بشریٰ بی بی کی اٹک جیل آمد ہوئی تو پولیس ناکے پر گاڑیوں کو آدھا گھنٹہ روکا گیا۔ وکیل نعیم حیدر پنجوتھہ نے بتایا کہ ملاقات کے لیے ہائی کورٹ اسلام آباد نے اجازت دی ہے۔

اٹک جیل انتظامیہ نے بشریٰ بی بی کو چیئرمین پی ٹی آئی سے ملاقات کی اجازت دے دی تاہم پی ٹی آئی وکلاء شیرافضل، نعیم پنجوتھا اور علی اعجاز بٹر کو اجازت نہ مل سکی۔

جیل کے باہر پولیس اور ایلیٹ فورس کے دستے ہائی الرٹ رہے جبکہ میڈیا کو بھی کوریج سے روک دیا گیا۔

یہ بھی پڑھیں:

عمران خان کی گرفتاری کیخلاف خاتون کا مبینہ احتجاج، چورنگی پر رقص کی ویڈیو وائرل

ذرائع کے مطابق بشریٰ بی بی کی چیئرمین پی ٹی آئی سے ملاقات تقریباً ایک گھنٹے تک جاری رہی جس کے بعد وہ واپس روانہ ہوگئیں۔

واضح رہے کہ 5 اگست کو ایڈیشنل سیشن جج ہمایوں دلاور نے توشہ خانہ کیس میں چیئرمین تحریک انصاف کو 3 سال قید اور ایک لاکھ روپے جرمانے کی سزا سنائی تھی۔

عدالت کی جانب سے سزا سنائے جانے کے بعد پولیس نے سابق وزیر اعظم کو لاہور میں ان کی رہائش گاہ سے گرفتار کر کے اٹک جیل منتقل کیا تھا۔