چیئرمین پیپلزپارٹی بلاول بھٹو کا مہنگائی کی ماری عوام سے اظہار یکجہتی

اسلام آباد: عوام کے ساتھ اظہار یکجہتی کرتے ہوئے پاکستان پیپلز پارٹی کے چیئرمین بلاول بھٹو زرداری نے کہا ہے کہ ان کی پارٹی ملک بھر میں بدترین مہنگائی کے خلاف عوام کے ساتھ کھڑی ہے۔

بدھ کے روز جاری ہونے والے ایک بیان میں بلاول بھٹو زرداری نے پاکستان پیپلز پارٹی کے کارکنان اور محنت کشوں کی جانب سے مختلف شہروں میں حکومت کی جانب سے کی جانے والی مہنگائی کے خلاف احتجاج کو سراہا ہے۔

بلاول بھٹو زرداری کا کہنا تھا کہ سندھ ، پنجاب ، بلوچستان اور خیبر پختونخوا میں مہنگائی کے خلاف احتجاج حکومت کے خلاف عدم اعتماد ہے۔ انہوں نے مزید کہا کہ مہنگائی کے خلاف پیپلز پارٹی کی منظم مہم گزشتہ 15 روز سے جاری ہے۔

یہ بھی پڑھیں 

وزیراعلیٰ بلوچستان کے خلاف تحریک عدم اعتماد صوبائی اسمبلی میں پیش

انسانی المیے سے بچنے کے لیے دنیا افغانستان کی مدد کرے، آرمی چیف

انہوں نے کہا کہ یہ حقیقت ہے کہ اس وقت ملک میں بدترین مہنگائی ہے اور پیپلز پارٹی ملک میں بدترین مہنگائی کے خلاف عوام کے ساتھ کھڑی ہے۔

دوسری جانب ملک میں بڑھتی ہوئی مہنگائی اور بے روزگاری کے خلاف پاکستان مسلم لیگ (ن) اور جمعیت علمائے اسلام (ف) نے راولپنڈی میں ریلی نکالی۔

مسلم لیگ (ن) اور جے یو آئی (ف) کے کارکنان پولیس کی رکاوٹیں عبور کرنے کے بعد مری روڈ پہنچے اور دھرنا دیا۔ مظاہرین نے اس موقع پر حکومت خلاف گیس چور اور آٹا چور کے نعرے بھی لگائے۔

پاکستان ڈیموکریٹک موومنٹ کی جانب سے مہنگائی کے خلاف ملک گیر احتجاج کے اعلان کے بعد آج راولپنڈی میں پہلی ریلی نگالی گئی ۔

ریلی نکالنے کا فیصلہ مسلم لیگ (ن) کے صدر اور قومی اسمبلی میں اپوزیشن لیڈر شہباز شریف کی صدارت میں پارٹی کے اعلیٰ سطح اجلاس میں کیا گیا۔ اجلاس میں عوام کے حقوق کے تحفظ کے لیے براہ راست احتجاج کرنے کا فیصلہ کیا گیا تھا۔