شبلی فراز کا دسمبر تک ملک میں بھنگ کی کاشت کی پالیسی لانے کا اعلان

اسلام آباد:وفاقی وزیرسائنس و ٹیکنالوجی شبلی فراز نے کہا ہے کہ بھنگ کے ایک بیج کی قیمت12 ڈالر ہے، روات کے قریب بھنگ کے بیج بھی تیار کیے جائیں گے،دسمبرتک ملک میں بھنگ کی کاشت کی پالیسی آجائیگی۔

قومی اسمبلی کی قائمہ کمیٹی برائے سائنس و ٹیکنالوجی کے اجلاس میں پی سی ایس آئی آرحکام نے بھنگ کی پیداوار کے منصوبے پر بریفنگ دیتے ہوئے بتایا کہ بھنگ کوصنعتی اورادویات میں استعمال کا منصوبہ تیار کیا گیا ہے۔

مزید پڑھیں:
بھنگ کا پودا کورونا وباء کی روک تھام کیلئے معاون ثابت ہوسکتا ہے، تحقیق

اقوامِ متحدہ نے گانجے اور بھنگ کو عالمی منشیات کی فہرست سے باہر نکال دیا

وفاقی وزیر شبلی فراز نے کہا کہ سی بی ڈی آئل کا ایک لیٹر 10ہزار ڈالر ہے روات میں ادویات میں استعمال کیلئے بھنگ کی کاشت شروع کی گئی ہے۔

انہوں نے کہا کہ بھنگ کے ایک بیج کی قیمت12 ڈالر ہے روات کے قریب بھنگ کے بیج بھی تیار کیے جائیں گے، 2025 تک بھنگ کی عالمی مارکیٹ 95ارب ڈالرتک پہنچ جائیگی۔

حکام نے بتایا کہ گجرخان میں صنعتی مقاصدکیلئے100ایکڑبھنگ کی کاشت شروع کریں گے اے این ایف نے بھنگ کی کاشت کیلئے4سائٹس کی منظوری دے دی ہے۔

وفاقی وزیر نے کہا کہ بھنگ کے منصوبے میں سرمایہ کاری کیلئے سرمایہ کاردلچسپی لے رہے ہیں ملک میں ابھی تک بھنگ کے حوالے سے کوئی پالیسی نہیں، دسمبرتک ملک میں بھنگ کی کاشت کی پالیسی آجائیگی۔