5 اگست 2019 مقبوضہ کشمیرکی تاریخ کاسیاہ دن ہے،علی امین گنڈا پور

اسلام آباد:وفاقی وزیر امور کشمیر و گلگت بلتستان علی امین گنڈا پور نے کہا ہے کہ 5 اگست 2019 کا دن مقبوضہ کشمیرکی تاریخ میں ایک اور سیاہ دن ہے، گزشتہ سال اس دن بھارت نے عالمی قوانین، یو این قراردادوں کی دھجیاں اڑائیں۔

انہوں نے اپنے ایک بیان میں کہا کہ بھارتی اقدامات آر ایس ایس متاثرہ اس ہندوتوا سوچ کی عکاسی کرتے ہیں۔علی امین گنڈاپور نے کہا کہ بھارت نے مقبوضہ کشمیر پر غیر قانونی قبضہ مضبوط کرنے کی قابل مذمت کوشش کی۔

وفاقی وزیر نے کہا کہ بھارتی اقدامات کا مقصد اقلیتوں خصوصی طور پر مسلمانوں سے امتیازی سلوک برتنا ہے، لاکھوں کشمیریوں کو اپنے ہی گھروں میں قیدی بنا دیا گیا ہے۔

انہوں نے کہا کہ مقبوضہ کشمیر کو دنیا کی سب سے بڑی جیل بنا دیا گیا ہے۔انہوں نے کہا کہ افسوس کے ساتھ کہنا پڑ رہا ہے کہ عالمی طاقتیں تمام صورتحال پر اپنی آنکھیں بند کئے ہوئے ہیں۔