حکومت کی غلط فہمی ہے کہ طاقت سے عوامی ردِ عمل دب جائے گا۔اسد عمر

اسلام آباد: سابق وفاقی وزیر اور تحریکِ انصاف کے مرکزی سیکریٹری جنرل اسد عمر نے کہا ہے کہ حکومت کی غلط فہمی ہے کہ طاقت سے عوامی ردِ عمل دب جائے گا، انہیں عمران خان کے خلاف طاقت استعمال کرنے کے مشورے دئیے جارہے ہیں۔

تفصیلات کے مطابق اسلام آباد میں پریس کانفرنس کے دوران این سی او سی کے سابق سربراہ اسد عمر نے کہا کہ اگر کوئی یہ سمجھتا ہے کہ عوامی ردِ عمل طاقت سے دبایا جاسکے گا تو اس کی غلط فہمی ہے۔ این اے سی نے شرحِ نمو میں 6 فیصد اضافے کی تائید کی۔

یہ بھی پڑھیں:

کھارادر بم دھماکہ، شہلا رضا کا شہید خاتون کے گھر کا دورہ

سابق سربراہ این سی او سی نے کہا کہ پی ٹی آئی دور میں زراعت میں 4.4 فیصد شرحِ نمو رہی اور 3 سال مسلسل زراعت کی کارکردگی میں بہتری آئی، صنعت بھی تیزی سے ترقی کرنے لگی۔ تحریکِ انصاف کے 3 سال میں 55لاکھ سے زائد افراد کیلئے روزگار بڑھا۔

مرکزی سیکریٹری جنرل پی ٹی آئی نے کہا کہ تحریکِ انصاف نے ثابت کیا کہ 1 کروڑ نوکریوں کا مذاق اڑانے والے سیاست دان اور تجزیہ کار غلطی پر تھے۔ پاکستانی حکومت کو اندرونی و بیرونی سازش اور ضمیر خرید کر اقتدار سے بے دخل کیا گیا۔ غیر یقینی معاشی صورتحال زہر ہے۔

انہوں نے موجودہ حکومت کی معاشی پالیسیوں پر تنقید کرتے ہوئے کہا کہ انتخابات کا اعلان ہی بہتری کا راستہ ہے جس سے سیاسی و معاشی عدم استحکام ختم ہوگا۔ پاکستانی قوم کا فیصلہ سب دیکھ رہے ہیں۔ عمران خان کی جدوجہد کسی سیاسی مقصد کے حصول کیلئے نہیں۔