گوگل نیوز پر ہمیں فالو کریںاسلام آباد: وفاقی وزیر برائے امورِ کشمیر و گلگت بلتستان انجینئر امیر مقام نے بڑی پیشگوئی کرتے ہوئے کہا ہے کہ عمران خان کا کوئی سیاسی مستقبل نہیں۔ بانی پی ٹی آئی کا چیپٹر کلوز ہوچکا ہے۔
نجی ٹی وی ڈان نیوز کی رپورٹ کے مطابق وزیر برائے امورِ کشمیر نے میڈیا سے گفتگو کے دوران کہا کہ پی ٹی آئی کی صوبائی حکومت بدعنوانی کے تمام ریکارڈز توڑ چکی ہے۔ ان کے صوبائی وزراء اپنی حکومت، رہنما اور وزیروں کی بدعنوانی کے گواہ ہیں۔
رپورٹ کے مطابق گفتگو کے دوران انجینئر امیر مقام نے کہا کہ تحریکِ انصاف کے قانون ساز مختلف عوامی ترقیاتی اسکیمز میں کمیشن حاصل کرنے کیلئے برسر پیکار ہیں۔ تحریکِ انصاف اور کارکنان صرف بانی پی ٹی آئی عمران خان کی رہائی کیلئے کوشاں ہیں۔
گفتگو کے دوران وفاقی وزیر انجینئر امیر مقام نے کہا کہ پی ٹی آئی کو عوامی مسائل کی فکر نہیں۔ عمران خان وزیراعظم ہاؤس، گورنر اور وزیر اعلیٰ ہاؤس کو یونیورسٹیز اور تعلیمی اداروں میں تبدیل کرنے کے دعویدار تھے، اس پر افسوس ہے۔
وفاقی وزیر برائے امورِ کشمیر نے کہا کہ خیبر پختونخوا حکومت یونیورسٹیز کی زمین بیچنے کی منصوبہ بندی کررہی ہے۔ گزشتہ 12سال سے صوبے پر حکومت کرنے والی پی ٹی آئی نے عوامی ترقیاتی پراجیکٹس میں تبدیلی نہیں کی۔
