گلوکار علی نور پر جنسی ہراسانی کے الزامات، عائشہ بنت راشد کون ہیں؟

پاکستانی شوبز انڈسٹری کے معروف گلوکار علی نور نے عائشہ بنت راشد کی طرف سے جنسی ہراسانی کے الزامات کی تردید کردی ہے۔ 

بنیادی طور پر جنسی ہراسانی کے واقعات رپورٹ کیے جانے پر رپورٹنگ کا رخ موڑا جاتا ہے اور پیش آنے والے واقعات میں تبدیلیاں کردی جاتی ہیں تاہم عائشہ بنت راشد نے جرات مندانہ قدم اٹھاتے ہوئے علی نور کا سامنا کیا۔

یہ بھی پڑھیں:

سوئس سیکریٹس، بینک اکاؤنٹس سے کون سے راز دنیا پر منکشف ہوئے؟

عائشہ بنت راشد کون ہیں؟

اسلام آباد سے تعلق رکھنے والی عائشہ بنت راشد ایک صحافی ہیں۔ انہوں نے علی نور پر جنسی ہراسانی کا الزام لگایا جو نوری بینڈ کے لیے مرکزی گلوکار رہے ہیں۔ 

جنسی ہراسانی کا الزام 

اپنی انسٹاگرام پوسٹس کی ایک سیریز میں عائشہ بنت راشد نے اپنے اور علی نور کے درمیان ہونے والی گفتگو کے اسکرین شاٹس شیئر کیے۔

جمعہ کی رات، عائشہ بنت راشد نے حقائق منظرِ عام پر لانے سے پہلے ذاتی طور پر پیغام دیتے ہوئے علی نور سے کہا کہ آپ نے ائیرپورٹ جاتے ہوئے میری کار کے پیچھے جو کچھ کیا، وہ جنسی ہراسانی تھا۔

عائشہ بنت راشد کا کہنا تھا کہ میں الزامات کے ساتھ منظرِ عام پر نہیں آنا چاہتی کیونکہ میں نوری بینڈ میں علی نور کے بھائی علی حمزہ اور ڈرمر کامی پال کا بھی احترام کرتی ہوں۔ 

علی نور کا جواب 

ہفتے کی دوپہر کو گلوکار علی نور نے عائشہ بنت راشد کے الزامات کا جواب دیتے ہوئے  کہا کہ میرے لیے یہ بات چشم کشا ہے۔ مجھے اخبارات نے بتایا کہ عائشہ بنت راشد مجھ پر ٹو مہم کے تحت الزامات عائد کررہی ہیں۔

گلوکار علی نور نے کہا کہ عائشہ بنت راشد نے پیغامات کے تمام تر اسکرین شاٹس شیئر نہیں کیے جو افسوس کی بات ہے۔ وہ مجھے سنجیدہ نہیں لے رہی تھیں تاہم مجھے خوشی ہے کہ یہ بات منظرِ عام پر آئی۔ 

انہوں نے یہ بھی کہا کہ مجھے اپنے آپ سے نفرت ہے۔ میں مکمل طور پر تباہ ہوگیا ہوں۔ تم نے ٹھیک کہا۔ کبھی کبھی آئینے کی ضرورت پڑتی ہے۔ میں نے یہ پڑھتے ہوئے قسم کھائی کہ میں زندہ نہیں رہنا چاہتا۔ میں واقعی تمہارا مجرم اور ہر سزا بھگتنے کو تیار ہوں۔ 

اعترافِ جرم سے یو ٹرن

اپنی غلطی تسلیم کرلینے کے بعد علی نور نے یو ٹرن لیتے ہوئے اپنے اوپر لگائے گئے جنسی ہراسانی کے الزامات کی تردید کرتے ہوئے کہا کہ میں کوئی جنسی زیادتی کرنے والا نہیں ہوں۔

ان کا کہنا تھا کہ میں پہلے ہی اچھا محسوس نہیں کررہا تھا اور اب میری دوسری دنیا کی طرف روانگی کی حوصلہ افزائی کی جارہی ہے۔ میں نے کوئی جرم نہیں کیا اور مجھے اس کا پچھتاوا نہیں ہے۔

اپنی انسٹاگرام اسٹوری میں بھی گلوکار علی نور کا کہنا تھا کہ یاد رکھیں میں کوئی جنسی ہراسگی کا مجرم نہیں اور یہ بھی یاد رکھیں کہ دوسروں کیلئے بہتر زندگی کی تمنا کرنے والا ہر انسان اہمیت رکھتا ہے۔