تحریکِ عدم اعتماد، یہ کیس وزیر اعظم کے ترجمانوں نے خراب کیا۔اعتزاز احسن

اسلام آباد: پی پی پی رہنما اور سینئر قانون دان اعتزاز احسن نے وزیر اعظم کے خلاف تحریکِ عدم اعتماد پر تبصرہ کرتے ہوئے کہا ہے کہ یہ کیس عمران خان کے وزراء، مشیروں اور ترجمانوں نے خراب کیا ہے جبکہ پی ٹی آئی کی الیکشن مہم شروع ہوگئی ہے۔

تفصیلات کے مطابق اپنے ایک بیان میں نامور ماہرِ قانون اعتزاز احسن نے کہا کہ ن لیگ کے لوگوں کو حساب دینا ہوگا کہ لندن کیوں گئے؟4 ہفتے کیلئے جانے والوں نے 2سال کیوں لگائے؟ سابق وزیر اعظم نواز شریف کی صحت کی رپورٹ دکھائی نہیں دیتی۔

یہ بھی پڑھیں:

عوامی قافلے لانگ مارچ میں شامل ہو کر اسلام آباد جائینگے۔مولانا فضل الرحمان

بیان میں پی پی پی رہنما اعتزاز احسن نے کہا کہ یہ چیزیں ووٹرز دیکھیں گے اور اگر تحریکِ عدم اعتماد منظور ہوگئی تو خوش قسمتی ہوگی۔ کیس عمران خان کے وزراء، ترجمانوں اور مشیروں نے خود خراب کیا، الیکشن مہم عمران خان نے شروع کی ہوئی ہے۔

اپوزیشن کی نیوٹرل نیوٹرل کی رٹ پر تبصرہ کرتے ہوئے معروف قانون دان اعتزاز احسن نے کہا کہ سیاسی گیم میں کوئی امپائر نیوٹرل یا غیر جانبدار نہیں ہوا کرتا۔ مولانا صاحب جو نیوٹرل امپائر کہہ رہے ہیں، اس کا مطلب یہ نکلتا ہے کہ امپائر ہمارے ساتھ ہے۔ 

سینئر پیپلز پارٹی رہنما نے کہا کہ فضل الرحمان اور پی پی پی کا مقصد وزیر اعظم عمران خان کو اقتدار سے بے دخل کرنا ہے۔ الیکشن کا مین پلیٹ فارم اور پوائنٹ کرپشن ہے۔ عمران خان کرپشن کی بات ایسے کرنے کی کوشش کر رہے ہیں کہ لوگ مہنگائی بھلا بیٹھیں۔

اعتزاز احسن نے کہا کہ لوگوں پر وزیر اعظم عمران خان کی باتوں کا کچھ اثر پڑ تو رہا ہے۔ اگر کوئی نیا وزیر اعظم آتا ہے تو اس پر بے روزگاری، مہنگائی اور دیگر مشکلات کا پہاڑ لدا ہوگا۔ اپوزیشن کو کابینہ بنانے پر پتہ چلے گا کہ مشکلات کہاں کہاں ہیں۔