پاکستان دنیا بھر میں مہنگائی سے متاثر ہونے والا واحد ملک نہیں۔صدرِ مملکت

اسلام آباد: صدرِ مملکت ڈاکٹر عارف علوی نے کہا ہے کہ مہنگائی صرف پاکستان میں نہیں بلکہ دنیا بھر میں بڑھ رہی ہے، پاکستان مہنگائی سے متاثر ہونے والا واحد ملک نہیں۔

تفصیلات کے مطابق صدرِ مملکت نے ملک بھر میں مہنگائی کے سونامی کا رونا رونے والی اپوزیشن کا پروپیگنڈہ مسترد کرتے ہوئے دنیا بھر کے معاشی مسائل سے پردہ ہٹا دیا۔ عرب میڈیا کو انٹرویو دیتے ہوئے ڈاکٹر عارف علوی نے کہا کہ دنیا بھر کی معیشتیں زبوں حالی کا شکار ہیں۔

یہ بھی پڑھیں:

مہنگائی تاریخ کی بلند ترین سطح پرہے۔ مولانا فضل الرحمن

ملک میں مہنگائی کی اصل ذمہ دار ماضی کی حکومتیں ہیں، بلال غفار

پی ٹی آئی حکومت بڑھتی ہوئی مہنگائی کو روکنے میں ناکام کیوں؟

انٹرویو کے دوران صدرِ مملکت ڈاکٹر عارف علوی نے کہا کہ پاکستان افغانستان میں تبدیلی لانے کیلئے فعال کردار ادا نہیں کر رہا بلکہ ہم صرف انسانی بنیادوں پر نئی حکومت کی ہر ممکن امداد کیلئے پر عزم ہیں۔ پاکستان افغانستان میں امن کا خواہاں ہے۔

صدرِ مملکت ڈاکٹر عارف علوی نے کہا کہ ہماری حکومت ملک بھر میں سرمایہ کاری کو فروغ دینا چاہتی ہے تاکہ معاشی مسائل حل ہوسکیں۔ متحدہ عرب امارات کی مثال ہمارے سامنے ہے جس کی پیروی کرکے پاکستان معاشی میدان میں آگے بڑھ سکتا ہے۔

انہوں نے کہا کہ گوادر اور دبئی کی بندرگاہیں معاشی و تجارتی سرگرمیوں کے فروغ کیلئے باہم تعاون کرسکتی ہیں۔ گوادر پورٹ کو رواں برس مکمل طور پر آپریشنل کر لیا جائے گا جس سے خطے میں تجارتی سرگرمیوں کو فروغ حاصل ہوگا۔