کراچی چیمبر نے مہران ٹاؤن کی کاٹیج صنعتوں پر لگی سیل ہٹانے کی اپیل کر دی

بزنس مین گروپ کی قیادت اور کراچی چیمبر آف کامرس اینڈ انڈسٹری کے عہدیداران نے سندھ بلڈنگ کنٹرول اتھارٹی کی جانب سے مہران ٹاؤن میں قائم ہزاروں کاٹیج صنعتوں کو سیل کر دینے کے اقدام پر کڑی تنقید کرتے ہوئے کہا کہ ان تمام کاٹیج صنعتوں کو یہ بہانہ بناکر سیل کردیا گیا کہ یہ رہائشی علاقے سے چلائی جارہی تھیں جو خالصتاً غیر قانونی کارروائی ہے 

ایک مشترکہ بیان میں چیئرمین بی ایم جی زبیر موتی والا، کے سی سی آئی کے صدر شارق وہرہ، سینئر نائب صدر ثاقب گڈلک، نائب صدر شمس الاسلام خان، کے سی سی آئی کی خصوصی کمیٹی برائے چھوٹے تاجران مجید میمن اور پی سی ایل سی چیف حفیظ عزیز نے نشاندہی کی کہ مہران ٹاؤن میں قائم ایک مخصوص فیکٹری میں پچھلے ماہ لگنے والی آگ جس میں قیمتی جانیں ضائع ہوئیں کے ردعمل میں تمام کاٹیج صنعتوں کوسیل کردیا گیا لیکن کسی ایک کی غفلت کی سزا سب کو دے دینا مسئلے کا حل نہیں تاہم یہ سراسر ایسے لاکھوں افراد کے ساتھ ناانصافی ضرورہے جومہران ٹاؤن کی کاٹیج صنعتوں سے منسلک ہیں۔

مزید پڑھیں:ایمازون اپنے 7 لاکھ 50 ہزار ملازمین کو مفت تعلیم دلانے کیلئے تیار

یہ کاٹیج انڈسٹریز بالخصوص خواتین کے لئے روزگار پیدا کرنے کا ایک بہت بڑا ذریعہ ہیں اور اسی وجہ سے یہ صنعتیں نہ صرف پاکستان بلکہ دنیا بھر میں محلوں میں قائم کی جاتی ہیں تاکہ خواتین باآسانی کام کرنے کے ساتھ ساتھ اپنے گھروں پر بھی توجہ دے سکیں۔

رہائشی علاقوں میں کاٹیج صنعتیں قائم کرنے کا سب سے بڑا فائدہ یہی ہے کہ ان کی بدولت خواتین کے لئے روزگار کے مواقع پیدا ہوتے ہیں جو ہمیشہ سے حکومت کی اولین ترجیح رہی ہے۔

انھوں نے کہا کہ تمام اقسام کے کاروبار بشمول چھوٹے تاجر، دکاندار، ریسٹورینٹ اور کاٹیج صنعتیں وغیرہ پہلے ہی کورونا وبا کی تباہی کے باعث مشکل ترین وقت سے گزر رہے ہیں۔

ایسے حالات میں ایس بی سی اے نے نرمی کا مظاہرہ کرنے کے بجائے مہران ٹاؤن کی کاٹیج صنعتوں کو سیل کرکے مشکلات میں مزید اضافہ کردیا ہے جس کے باعث لاکھوں افراد بے روزگار ہو جا ئیں گے اور ان کے لئے پریشانیاں بڑھیں گی۔

بی ایم جی قیادت اور کراچی چیمبر کے عہدیداران نے لاکھوں افراد کو بے روزگار ہونے اور ان سے منسلک خاندانوں کے غربت اور فاقوں سے بچانے کے لئے سندھ حکومت سے اپیل کی کہ وہ اس سنگین ترین مسئلے میں مداخلت کرتے ہوئے ایس بی سی اے کواحکامات جاری کرے کہ مہران ٹاؤن میں موجود تمام کاٹیج صنعتوں پر لگی سیل کو فوری طورپر پر ہٹا دیا جائے اور انہیں ریگیولرائز بھی کیا جائے تاکہ ان صنعتوں کے مالکان اور ان سے جڑے تمام ورکرز سکھ کا سانس لیتے ہوئے اپنی سرگرمیاں جاری رکھ سکیں۔