گوگل نیوز پر ہمیں فالو کریںاسلام آباد : سابق سفیر کی بیٹی نور مقدم کے قتل کے مقدمے میں مرکزی ملزم ظاہر جعفر کے ایک ملازم کو 14 روزہ جوڈیشل ریمانڈ پر بھیج دیا گیا ہے۔
ہفتہ کو اسلام آباد ہائی کورٹ میں مقدمے کے تفتیشی افسر نے عدالت کے روبرو ملزم کی تفصیلات اور کیس کی تفتیش اور دیگر حقائق پیش کیے۔
ملزم جان محمد ولد خان محمد سکنہ مانسہرہ ملزم ظاہر جعفر کے گھر میں مالی تھا اور وقوعہ کے روز موقع وہاں موجود تھا، تفتیشی افسر نے عدالت سے ملزم کے جوڈیشل ریمانڈ کی استدعا کی۔
عدالت نے استدعا منظور کرتے ہوئے ملزم کو 14 روزہ جوڈیشل ریمانڈ پر جیل بھیج دیا ہے۔ ملزم کو آئندہ 28 اگست 2021 کو دوبارہ پیش کرنے کا حکم صادر کیا۔
خیال رہے کہ رواں برس 20 جولائی کو سابق سفیر شوکت مقدم کی صاحبزادی نور مقدم کو اسلام آباد کے سیکٹر ایف سیون فور میں گلا کاٹ کر قتل کر دیا گیا تھا۔
اس مقدمے کے مرکزی ملزم ظاہر جعفر اور اس کے والدین سمیت دیگر ملزمان کا نام ای سی ایل میں شامل ہے جبکہ مرکزی ملزم ظاہر جعفر کو راولپنڈی کے اڈیالہ جیل میں 14 روزہ جوڈیشل ریمانڈ پر بھیجا گیا تھا۔
ملزم ظاہر جعفر کو جوڈیشل مجسٹریٹ کے سامنے 16 اگست کو پیش کیا جائے گا۔
یہ بھی پڑھیں : آر آئی یو جے کا انتخابی شیڈول جاری، امیدواروں کے کاغذات نامزدگی جمع کرا دیئے
