کراچی میں انٹر کے ملتوی پرچوں اور میٹرک کے پریکٹیکل کی تاریخوں کا اعلان

ثانوی تعلیمی بورڈکراچی اوراعلیٰ ثانوی تعلیمی بورڈ نے کراچی میں انٹر کے ملتوی پرچوں اور میٹرک کے پریکٹیکل کی تاریخوں کا اعلان کردیا ہے۔

اعلی ثانوی تعلیمی بورڈ کراچی کے چیئرمین پروفیسر ڈاکٹر سعید الدین نے کورونا کی چوتھی لہر کی وجہ سے لگنے والے لاک ڈان کے باعث انٹرمیڈیٹ بارہویں جماعت کے سالانہ امتحانات برائے 2021 کے ملتوی ہونے والے پرچوں کے نئے شیڈول کا اعلان کردیا ہے۔

نئے شیڈول کے مطابق 10اگست کو باٹنی، 11اگست کو زولوجی اور 12اگست کو اکنامکس کا پرچہ لیا جائے گا۔

چیئرمین انٹربورڈ پروفیسر ڈاکٹر سعید الدین نے تفصیلات بتاتے ہوئے کہا کہ 31جولائی کے ملتوی ہونے والے پرچے اب بروز منگل 10اگست کو، 2 اگست کے ملتوی ہونے والے پرچے بروز بدھ 11اگست کو، 3اگست کے ملتوی ہونے والے پرچے بروز جمعرات 12اگست جبکہ 4اگست کے ملتوی ہونے والے پرچے بروز جمعہ 13اگست کو سابقہ شیڈول کے تحت انہی امتحانی مراکز پرلیے جائیں گے۔

مزید پڑھیں:سندھ میں آج سے لاک ڈاؤن ختم، کاروباربحال، 31 اگست تک پابندیاں برقرار

چیئرمین انٹربورڈ پروفیسر ڈاکٹر سعید الدین نے مزید بتایا کہ گیارہویں جماعت اور امپروومنٹ آف ڈویژن، بارہ پرچوں، اسپیشل چانس، بینیفٹ کیسز، ایڈیشنل سبجیکٹس اور شارٹ سبجیکٹ کے امتحانات کی تاریخوں کا اعلان بعد میں کیا جائے گا۔

ثانوی تعلیمی بورڈکراچی کے چیئرمین سید شرف علی شاہ نے کہا ہے کہ سندھ حکومت کی جانب سے شہر میں لاک ڈاؤن کے باعث سالانہ پریکٹیکل کا امتحانی شیڈول ملتوی کر دیا گیا تھا۔

انہوں نے کہا کہ بورڈ کی جانب سے پہلے سے دیئے گئے امتحانی شیڈول کے مطابق 9 اگست سے 17 اگست2021 تک سالانہ عملی (پریکٹیکل) امتحانات لے سکتے ہیں۔

چیئرمین بورڈ سید شرف علی شاہ نے بورڈ سے الحاق شدہ اسکولوں کے سربراہان کو کہا ہے کہ جن اسکولوں نے ابھی تک پریکٹیکل امتحانات نہیں لئے ہیں وہ کورونا وباء کے باعث سخت ایس او پیز کے ساتھ امتحانات کو یقینی بنائیں اورجلد ہی پریکٹیکل امتحانات کے نتائج کو بورڈ کے متعلقہ سیکشن میں لازمی جمع کرائیں۔