کراچی سمیت سندھ بھر میں سی این جی اسٹیشنز8دن کیلئے بند

کراچی:گیس کی قلت کے باعث سندھ میں سی این جی اسٹیشنزتقریباً8 دن کیلئے بند کر دیئے گئے ، صنعتوں کو بھی گیس کی فراہمی کا سلسلہ بحال نہ ہوسکا۔

سوئی سدرن کے مطابق گیس فیلڈز مرمت کے سبب ایس ایس جی سی نظام میں گیس قلت ہے۔گیس خود کفیل صوبہ سندھ میں ایک دو دن نہیں بلکہ تقریبا 8 دن کیلئے سی این جی بند ہوگئی، اور بھی حیرت انگیز بات یہ ہے کہ دو ایل این جی ٹرمینلز سے بھی امپورٹڈ گیس کا بھی کوئی آسرا نہ مل سکا۔

سی این جی پمپس مالکان نے ڈسپنسرز پر چادریں لپیٹ دیں اور اب 70 فیصد گیس پیدا کرنے والے صوبے کے رہائشی اپنی گاڑیوں میں پیٹرول ڈلوا رہے ہیں۔

مزید پڑھیں:4دنوں میں ایل پی جی کی قیمت میں تیسری مرتبہ اضافہ

سی این جی پمپس مالکان کے مطابق مقامی گیس کے بجائے ایل این جی خریداری کا معاہدہ اس یقین دہانی پر کیا تھا کہ اب سی این جی لوڈشیڈنگ نہیں ہو گی۔

دوسری جانب سندھ سے بڑا سوال اٹھ رہا ہے کہ اولین گیس استعمال کا حق نہ ملنے کے بعد یہاں تعمیر دو ایل این جی ٹرمینلز سے بھی گیس بندوبست نہ ہونے کے پیچھے کیا منصوبہ بندی کار فرما ہے۔

سائٹ ایسوسی ایشن آف انڈسٹری کے صدر عبدالہادی نے سوئی سدرن گیس کمپنی کی جانب سے 2 دن کی بندش کے بعد وعدے کے مطابق سائٹ ایریا کراچی کی صنعتوں کی گیس بحال نہ کرنے پر شدید احتجاج کیا ہے اور وزیراعظم عمران خان سے مدد کی اپیل کرتے ہوئے استدعا کی ہے کہ وہ ایس ایس جی سی کو صنعتوں کو مکمل پریشر کے ساتھ فوری طوری پرگیس بحال کرنے کی سختی سے ہدایات جاری کریں بصورت دیگر صنعتکار اپنی فیکٹریاں شفٹ کرنے پر مجبور ہوجائیں گے۔

سائٹ ایسوسی ایشن آف انڈسٹری کے صدر نے وزیراعظم عمران خان سے اپیل میں مزید کہاکہ ایس ایس جی سی نے 2دن گیس بندش کا نوٹیفیکیشن جاری کیا تھا مگر وعدے کے مطابق 2دن بعد بھی صنعتوں کی گیس بحال نہیں کی بلکہ سوئی سدرن گیس کمپنی صنعتکاروں کو کوئی بھی مثبت جواب دینے سے گریزاں ہے۔