پاکستانی کوہ پیماؤں نے دنیا کی 10ویں بلند ترین چوٹی انناپورنا سر کرلی

کراچی: پاکستانی کوہ پیماؤں نے دنیا کی دسویں بلند چوٹی اننا پورنا پر قومی پرچم لہرا دیا ہے۔ کوہ پیماؤں نے اپنی فتح کو قومی ہیرو محمد علی سدپارہ مرحوم کے نام کیا ہے

تفصیلات کے مطابق گلگت کے ضلع ہنزہ سے تعلق رکھنے والے کوہ پیماء سرباز خان اور کوہ پیماء عبدل جوشی نے آج  ایک بج کر 30 منٹ پر 8091 میٹر بلند دنیا کی 10ویں بلند چوٹی اننا پورنا کو سر کرلیا ہے۔

اننا پورنا چوٹی سر کرلینے کے بعد دونوں کوہ پیماؤں کو یہ اعزاز بھی حاصل ہوا ہے کہ وہ مذکورہ چوٹی سر کرنے والے پہلے پاکستانی کوہ پیما ہیں۔

 ٹیم منیجر محمد سعد کا کہنا ہے کہ دونوں کوہ پیماؤں نے چوٹی سر کر نے سے متعلق بیس کیمپ کو ریڈیو کے ذریعے آگاہ کیا ہے جس میں انہوں نے قوم کی جانب سے دعائیں کرنے پر پوری پاکستانی قوم کا شکریہ ادا کیا ہے۔

واضح رہے کہ نیپال میں واقع اس چوٹی کو دیگر ممالک سے تعلق رکھنے والے 12 کوہ پیماؤں نے بھی  سر کیا ہے لیکن یہ پہلا پاکستانی جوڑا ہے جس نے یہ چوٹی سر کی ہے۔

کوہ پیماؤں نے اپنی فتح کو قومی ہیرو محمد علی سدپارہ مرحوم کے نام کیا ہے جبکہ قوم دونوں کوہ پیماؤں کی بحفاظت واپسی کے لئے بھی دعاگو ہے۔