پیپلزپارٹی عوامی فلاح کی ہر کوشش سبوتاژ کرنے پر کمربستہ ہے، حلیم عادل شیخ

کراچی:حلیم عادل شیخ کی چیف آرگنائزر سیف اللہ خان نیازی سے نہایت اہم ملاقات، حلیم عادل شیخ کا اس موقع پر کہنا تھا کہ کرپشن اور وسائل کی لوٹ مار میں ملوث پیپلزپارٹی کی صوبائی حکومت نے سندھ اور اسکے عوام کی زندگیاں اجاڑ کررکھ دی ہیں۔

کراچی سے کشمور تک پورا سندھ لاقانونیت، محرومی اور حکمرانوں کی ڈاکہ زنی کا بدنما منظر پیش کررہا ہے، وزیراعظم کی مقبولیت اور سندھ میں اپنے انجام سے خوفزدہ پیپلزپارٹی عوامی فلاح کی ہر کوشش سبوتاژ کرنے پر کمربستہ ہے۔ قیادت اجازت دے، بھرپور سیاسی حکمت عملی کے ذریعے کرپٹ ٹولے کا تعاقب کریں گے۔

چیف آرگنائزر پاکستان تحریک انصاف سیف اللہ خان نیازی نے کہا حزب اختلاف کی کل جماعتی کانفرنس سیاسی طور پر شکست خوردہ گروہ کی جانب سے عوامی توجہ منتشر کرنے کی ناکام کوشش ہے۔

زرداری اور ابن زرداری کی میزبانی میں اسلام آباد میں جمع ہونے والوں نے ملک و قوم کو تباہی کے دھانے پر پہنچایا ہے، قومی وسائل کی لوٹ کھسوٹ سے دولت کے انبار لگانے والوں نے محض ذاتی فائدے کیلئے ادارے تباہ کئے۔

قوم وزیراعظم عمران خان کی قیادت پر مکمل یکسو اور نظام کی اصلاح کیلئے تحریک انصاف کی کاوشوں کی پشت پناہی کررہی ہے۔داخلی طور پر انتشار کی کوششیں کرنے والے خودغرض سیاسی ٹولے کا ڈٹ کر مقابلہ کریں گے۔

کراچی کے عوام کیلئے وزیراعظم کا تاریخی پیکیج ابتداء ہے، تعمیر و فلاح کا ایجنڈا پورے سندھ تک پھیلائیں گے۔ تحریک انصاف سندھ کو کرپشن اور ظلم کے چنگل سے چھڑوا کر تعمیر وترقی کے راستے پر گامزن کرے گی۔