ایف آئی اے کی ارشد ویڈیو ملک کیس میں دہشت گردی کی دفعات لگانے کی حمایت

اسلام آباد :ایف آئی اے نے جج ویڈیو کیس میں دہشت گردی کی دفعات لگانے کی حمایت کر دی ،جج ویڈیو کیس میں دہشتگردی ایکٹ کی دفعات شامل کرنے کے خلاف درخواست پر سماعت انسداد دہشت گردی کی عدالت کے جج راجا جواد عباس نے کی ۔

پیر کو دور ان سماعت ایف آئی اے کے سپیشل پراسیکیوٹر سید محمد طیب ایڈووکیٹ عدالت میں پیش ہوئے ۔ایف آئی اے نے جج ویڈیو کیس میں دہشت گردی کی دفعات لگانے کی حمایت کر دی ۔

ایف آئی اے پراسیکیوٹر نے کہاکہ سپریم کورٹ کے جج ویڈیو کیس سے متعلق فیصلے کا اطلاق اس معاملے پر نہیں ہو گا۔ سید محمد طیب ایڈووکیٹ نے کہاکہ جج کو فیصلے کے لیے پریشرائز کرنا دہشت گردی کے زمرے میں آتا ہے۔

مزید پڑھیں:جج ارشد ملک ویڈیو اسکینڈل کیس میں ناصر جنجوعہ سمیت تین ملزمان گرفتار

ملزمان نے جج ویڈیو کیس میں دہشت گردی کی دفعات شامل کرنے کو چیلنج کر رکھا ہے ۔ درخواست میں استدعا کی گئی کہ مقدمہ سے دہشت گردی کی دفعات خارج کر کے ٹرائل کے لیے واپس انسداد الیکٹرانک کرائم کی عدالت بھجوایا جائے۔

ایف آئی اے نے عدالتی دائرہ اختیار کے خلاف ملزمان کی درخواست کی مخالفت کردی ۔بعد ازاں کیس کی سماعت 30 جولائی تک ملتوی کر دی گئی ۔ آئندہ سماعت پر بھی ایف آئی اے پراسیکیوٹر کے دلائل جاری رہیں گے۔