گوگل نیوز پر ہمیں فالو کریںبرطانیہ نے پاکستان کی سیکیورٹی صورتحال میں بہتری کا اعتراف کرتے ہوئے پاکستان کے لیے اپنی ٹریول ایڈوائزری ( شہریوں کو سفر کے لیے پابندیوں ) میں نرمی کااعلان کردیا۔
پاکستان میں امن و امان کی صورتحال میں بہتری کے باعث برطانوی حکومت نے اپنے شہریوں کے لیے سفری ہدایات میں نرمی کردی ہے، نئی ٹریول ایڈوائزری میں برطانوی شہریوں کے لئے پاکستان کے شمالی علاقوں کے سفر کومحفوظ قرار دیا گیا ہے۔
پاکستان میں تعینات برطانوی ہائی کمشنر کرسچیئن ٹرنر نے سماجی رابطوں کی ویب سائٹ ٹوئٹر پر جاری کردہ ویڈیو پیغام میں بتایا کہ پاکستان میں امن عامہ کی بہتر ہوتی ہوئی صورتحال کے پیش نظر برطانیہ نے اپنے شہریوں کیلئے پاکستان کے حوالے سےسفر کے لیے پابندیوں میں نرمی کردی ہے۔
برطانوی ہائی کمیشن کے اعلامیے میں کہا گیا ہے یہ اعلان برطانیہ کا پاکستان کے لیے سفری ہدایات کے تفصیلی جائزے کا نتیجہ ہے جو ملک میں سیکیورٹی صورت حال کا وسیع جائزے کی بنیاد پر کیا گیا۔
برطانوی ہائی کمشنر کے مطابق اب برطانوی شہریوں کو پاکستان کے شمالی علاقہ جات بشمول کیلاش اور بموریت جیسی دلفریب وادیوں کے بذریعہ سڑک سفر کو بھی محفوظ قرار دیا گیا ہے جب کہ 2015 کے بعد سفری ہدایات میں واضح طور پر کی جانے والی یہ پہلی ترامیم ہیں۔
UK travel advice change: pleased that ???????? nationals will be able to see more of what ???????? has to offer pic.twitter.com/BvNYE6erX1
— Christian Turner (@CTurnerFCO) January 24, 2020
برطانوی ہائی کمشنرکا کہنا تھا کہ پاکستان میں سیکیورٹی صورتحال بہتر ہوگئی ہے جو کہ پاکستان کی سخت محنت کا نتیجہ ہے، مجھے خوشی ہے کہ اب برطانیہ کے شہری پاکستان میں موجود خوبصورت سیاحتی مقامات سے زیادہ لطف اندوز ہوسکیں گے۔
ان کا کہناتھا کہ دسمبر2019 میں پاکستان میں اپنی ذمہ داریاں سنبھالنے کے بعد سفری ہدایات کا جائزہ ترجیحی بنیادوں پر لیا، امن وامان کی بہتری کے باعث ڈیوک اینڈ ڈچز آف کیمبرج کا دورہ پاکستان ممکن ہوا۔
یہ بھی پڑھیں: بریگزٹ ڈیل: ملکہ برطانیہ نے یورپی یونین سے علیحدگی کی منظوری دے دی
