گوگل نیوز پر ہمیں فالو کریںاسلام آباد: وزیر اعظم کی معاونِ خصوصی برائے اطلاعات و نشریات فردوس عاشق اعوان اور سندھ کے صوبائی وزیر اطلاعات و محنت سعید غنی کے درمیان ٹوئٹر پر لفظی جنگ ہوئی جس کے دوران اعدادوشمار کے ساتھ گفتگو کی گئی۔
سماجی رابطے کی ویب سائٹ ٹوئٹر پر اپنے پیغام میں معاونِ خصوصی اطلاعات فردوس عاشق اعوان نے گزشتہ روز کہا کہ سعید غنی صاحب! آپ کی لاعلمی پر افسوس ہے، آپ نے قوم کا مال لوٹا اور جھوٹے اعدادوشمار پر معیشت چلائی۔
ٹوئٹر پیغام میں معاونِ خصوصی اطلاعات فردوس عاشق اعوان نے کہا کہ آپ کو یہ بھی علم نہیں کہ وزیر اعظم عمران خان کی قیادت میں ٹیکس وصولیوں میں اضافہ ہوا؟ رواں سال زیادہ ٹیکس حاصل کیا گیا۔
پیغام میں معاونِ خصوصی اطلاعات فردوس عاشق اعوان نے کہا کہ رواں مالی سال کی ششماہی میں حاصل کردہ ٹیکس 2085 ارب ہے جو گزشتہ سال کے مقابلے میں 16.4 فیصد زیادہ ہے۔
سعیدغنی صاحب آپ کی لاعلمی پرافسوس ہے۔قوم کامال لوٹنے اورجھوٹے اعدادو شمار پر معیشت چلانے والوں کو یہ بھی علم نہیں کہ وزیر اعظم عمران خان کی قیادت میں ٹیکس وصولیوں میں اضافہ ہوا ہے ۔رواں مالی سال کی ششماہی میں حاصل کردہ ٹیکس 2085ارب ہے جوپچھلے سال کے مقابلے میں 16.4فیصد زیادہ ہے
— Dr. Firdous Ashiq Awan (@Dr_FirdousAwan) January 13, 2020
معاونِ خصوصی فردوس عاشق اعوان نے کہا کہ درآمدات کی تعداد 21 فیصد کم ہوئی جبکہ داخلی ٹیکسز یعنی انکم ٹیکس، سیلز ٹیکس اور ایکسائز ڈیوٹی میں بالترتیب 21.2، 34 اور 25.6 فیصد اضافہ ہوا۔
ڈاکٹر فردوس عاشق اعوان نے کہا کہ اسمارٹ فونز کے ذریعے سالانہ گوشوارے جمع کرانے کے لیے ٹیکس آسان ایپ متعارف کرائی گئی۔ ٹیکس وصولیوں کو تحریک کی شکل دی گئی۔
درآمدات کی تعداد21فیصد کم ہوئی جبکہ داخلی ٹیکسوں یعنی انکم ٹیکس، سیلز ٹیکس اور ایکسائز ڈیوٹی میں بالترتیب 21.2فیصد ، 34فیصد اور 25.6فیصد اضافہ ہوا ۔ سمارٹ فونز کے ذریعے سالانہ گوشوارے جمع کرانے کیلئے ٹیکس آسان ایپ متعارف کرایا گیا۔
— Dr. Firdous Ashiq Awan (@Dr_FirdousAwan) January 13, 2020
ٹیکس وصولیوں پر حکومت کی تعریف کرتے ہوئے فردوس عاشق اعوان نے کہا کہ عمران خان وہ پہلے وزیر اعظم ہیں جنہوں نے ملک میں ٹیکس وصولیوں کو تحریک کی شکل دی اور ٹیکس اصلاحات پر کام شروع کیا۔
فردوس عاشق اعوان نے کہا کہ ایف بی آر کے پورٹل پر لوگوں کے سفر، زمین کے لین دین، ود ہولڈنگ اور گاڑیوں سے متعلق تفصیلات میسر ہیں۔ اس سال 105 ارب جبکہ گزشتہ سال 36ارب کے ری فنڈ جاری ہوئے۔
اس سال 105ارب کے ری فنڈ جاری ہوئے۔ پچھلے سال 36ارب کے ری فنڈ جاری ہوئے تھے۔
2/2— Dr. Firdous Ashiq Awan (@Dr_FirdousAwan) January 13, 2020
براہِ راست حملے پر وزیر اطلاعات سندھ سعید غنی بھی خاموش نہ رہ سکے۔انہوں نے ٹوئٹر پیغام میں جواب دیتے ہوئے کہا کہ فردوس باجی لاعلم میں نہیں، آپ ہیں۔ گزشتہ مالی سال آپ کی نااہل حکومت نے کم ریونیو اکٹھا کیا۔
وزیر اطلاعات سندھ سعید غنی نے کہا کہ یہ تاریخ کا واحد سال تھا جب گزشتہ سال کے مقابلے میں کم ریونیو اکٹھا ہوااور رواں سال بھی آپ ہدف سے بہت پیچھے ہیں۔ موازنہ بھی بد ترین اعدادوشمار سے کر رہی ہیں۔
فردوس باجی لاعلم میں نہیں آپ ہیں گذشتہ مالی سال پاکستان کی تاریخ کا واحد سال تھا جب آپکی نااہل حکومت نے پچھلے سال کے مقابلے میں کم ریوینو اکٹھا کیا اور رواں سال بھی ٹارگٹ سے بہت پیچھے ہیں اور آپ موازنہ بھی اسی بدترین اعدادوشمار سے کررہی ہیں۔
1/2 https://t.co/sMT9JN9Iq4— Senator Saeed Ghani (@SaeedGhani1) January 13, 2020
پیپلز پارٹی کے صوبائی وزیر سعید غنی نے کہا کہ آپ کے ٹویٹ لکھنے والے کو شاید یہ علم نہیں کہ جس دور کو آپ لوٹ مار اور جھوٹے اعدادوشمار کا دور کہہ رہی ہیں، اس میں کون کون کام کر رہا تھا۔
صوبائی وزیر سعید غنی نے کہا کہ آپ کے بقول لوٹ مار کے دور میں آپ کے شعبۂ خزانہ، وزارتِ خارجہ اور دیگر شعبہ جات کے وزیر کابینہ کا حصہ تھے۔
آپکے ٹویٹ لکھنے والے کو شاید یہ علم نہیں کہ جس دور کو آپ لوٹ مار اور جھوٹے اعدادوشمار کا دور کہہ رہی ہیں اس لوٹ مار کے دور میں آپ آپکے خزانہ، خارجہ اور دیگر وزراء کابینہ کا حصہ تھے۔
2/2 https://t.co/sMT9JN9Iq4— Senator Saeed Ghani (@SaeedGhani1) January 13, 2020
