گوگل نیوز پر ہمیں فالو کریںایرانی خبر رساں ادارے ایرنا نے دعویٰ کیا ہے کہ حالیہ ایرانی حملے کے دوران ایران کی فضائیہ نے اسرائیل کی فضائی حدود پر مکمل کنٹرول حاصل کرلیا ہے۔ یہ دعویٰ پاسداران انقلاب کے جاری کردہ ایک بیان کی بنیاد پر کیا گیا ہے۔
بیان میں کہا گیا کہ آج کے حملے نے ثابت کر دیا ہے کہ ہم اسرائیل کی فضاؤں پر مکمل گرفت حاصل کر چکے ہیں اور اسرائیلی شہری ایرانی میزائل حملوں کے سامنے مکمل طور پر بے بس ہیں۔
ادھر ایرانی خبر رساں ادارے مہر نے اطلاع دی ہے کہ پاسداران انقلاب نے تل ابیب کے علاقے نوے زیدک کے مکینوں کو فوری انخلا کا مشورہ دیا ہے۔
دوسری جانب اسرائیلی فوج نے تصدیق کی ہے کہ ایران کی جانب سے دو میزائل فائر کیے گئے ہیں۔
اس کے برعکس اسرائیلی افواج کا دعویٰ ہے کہ حالیہ کارروائیوں کے بعد انہوں نے ایران کے دارالحکومت تہران کی فضاؤں میں بغیر کسی بڑی مزاحمت کے پرواز کی صلاحیت حاصل کرلی ہے۔
اسرائیلی فوج کے مطابق انہوں نے ایران کے فضائی دفاعی نظام کو بری طرح نقصان پہنچایا ہے جس کے بعد اب اسرائیل کے لیے ایران کے اندر مختلف اہداف کو نشانہ بنانا نسبتاً آسان ہو چکا ہے۔
یاد رہے کہ 13 جون (جمعہ) کو اسرائیل نے ایران میں متعدد فوجی اور جوہری تنصیبات پر مربوط فضائی اور ڈرون حملے کیے تھے جس کے جواب میں تہران نے بھی شدید جوابی کارروائی کی۔ اس کے بعد سے خطے میں کشیدگی خطرناک حد تک بڑھ چکی ہے۔
