آمدن سے زائد اثاچہ جات کیس، خورشیدشاہ کیخلاف کیس کی سماعت 7 جنوری تک ملتوی

اسلام آباد: سابق قائدِ حزبِ اختلاف اور پاکستان پیپلز پارٹی کے سینئر اسیر رہنما سید خورشید شاہ کے خلاف آمدن سے زائد اثاثہ جات کیس کی سماعت 7 جنوری تک ملتوی کر دی گئی۔

قومی احتساب بیورو سکھر کی جانب سے پاکستان پیپلز پارٹی کے مرکزی رہنما سید خورشید احمد شاہ، ان کے بیٹوں فرخ شاہ، زیرک شاہ، ان کی بیگمات طلعت بی بی اور گلناز بی بی، داماد صوبائی وزیر اویس قادر شاہ سمیت 18 افراد کے خلاف ایک ارب 30 کروڑ روپے سے زائد اثاثے بنانے کے الزام میں داخل ریفرنس کی آج سکھر کی احتساب عدالت میں سماعت ہوئی۔

یہ بھی پڑھیں: مسلم لیگ ن کے رہنما احسن اقبال نارووال اسپورٹس سٹی کیس میں نیب کے حوالے

سماعت کے موقع پر پاکستان پیپلز پارٹی کے مرکزی رہنما سید خورشید احمد شاہ کو ایمبولینس پر این آئی سی وی ڈی اسپتال سے عدالت لایا گیا جبکہ ان کی بیگمات، صاحبزادے اور داماد بھی عدالت میں پیش ہوئے۔

عدالت میں سماعت کے دوران نیب پراسیکیوٹر اور خورشید شاہ کے وکلاء نے اپنے اپنے مختصر دلائل بھی دیئے، عدالت نے نیب کی جانب سے تیار کیے گئے ریفرنس کا جائزہ لیا اور نیب کو آئندہ سماعت پر ملزمان پر لگائے گئے الزامات کے ثبوت پیش کرنے کا حکم دیتے ہوئے ریفرنس کی سماعت 7 جنوری تک ملتوی کر دی۔