گوگل نیوز پر ہمیں فالو کریںپیپل میگزین نے 2024 کا “سیکسیسٹ مین الائیو” (سب سے پرکشش مرد) کا خطاب “دی آفس” کے اداکار جان کراسنکی کو دیا ہے۔
جان کراسنکی کو یہ اعزاز ٹی وی شو “دی لیٹ شو ود اسٹیفن کولبرٹ” کے منگل کے ایپی سوڈ میں دیا گیا۔ میگزین نے اپنے نئے شمارے کے سرورق کی تصویر سوشل میڈیا پر بھی شیئر کی۔
جان کراسنکی کو سب سے زیادہ “دی آفس” میں جم ہالپرٹ کے کردار کے لیے جانا جاتا ہے۔ انہوں نے اپنی اہلیہ اداکارہ ایملی بلنٹ کے ساتھ 2018 کی فلم “اے کوائٹ پلیس” میں اداکاری اور ہدایت کاری کی اور اس کا سیکوئل 2020 میں بھی ڈائریکٹ کیا۔
انہوں نے 2018 سے 2023 تک پرائم ویڈیو کی ٹی وی سیریز “ٹام کلینسی کا جیک ریان” میں مرکزی کردار ادا کیا اور گزشتہ ماہ اس سیریز پر مبنی ایک فلم کا اعلان بھی کیا گیا۔
جان کراسنکی 2010 سے اداکارہ ایملی بلنٹ کے ساتھ رشتہ ازدواج میں منسلک ہیں اور ان کی دو بیٹیاں ہیں۔
ایک انٹرویو میں جان کراسنکی نے بتایا کہ ان کی اہلیہ نے اس اعزاز کے اعلان پر خوشگوار ردعمل دیا۔ انہوں نے مذاق میں کہا کہ اگر وہ یہ خطاب جیتیں تو ایملی بلنٹ ان کے سرورق کی تصویر سے پورے گھر کو سجانے کا ارادہ رکھتی تھیں۔
جان کراسنکی نے ہنستے ہوئے کہا، “میرے بچے اس ڈیکوریشن کو پسند کریں گے، یہ بالکل عجیب نہیں ہوگا۔”
اس سے پہلے 2023 میں یہ اعزاز “گریز ایناٹومی” کے اداکار پیٹرک ڈیمپسی کو دیا گیا تھا۔
