کراچی کے مختلف علاقوں میں موسلا دھار بارش، شہر میں برسات کب تک جاری رہے گی؟

کراچی: محکمہ موسمیات کی جانب سے صوبہ سندھ میں 27 سے 31 اگست تک بارشوں کی پیش گوئی کے بعد منگل کی رات اور بدھ کی صبح سے شہر قائد میں بارش کا سلسلہ جاری ہے۔

گزشتہ شام شروع ہونے والی موسلادھار بارش نے تیز ہواؤں کے ساتھ شدت اختیار کی جس سے گلستان جوہر، راشد منہاس روڈ، نارتھ کراچی، ایف بی ایریا، بفر زون، عائشہ منزل، کریم آباد، ناظم آباد سمیت مختلف علاقے متاثر ہوئے۔

بارش کے باعث ممکنہ سیلاب کے خدشات بڑھ گئے۔ موسلادھار بارش دیگر اہم علاقوں جیسے آئی آئی چندریگر روڈ، ٹاور، پی ای سی ایچ ایس، کشمیر روڈ، ایم اے جناح روڈ، صدر، لائٹ ہاؤس، بولٹن مارکیٹ، کلفٹن، لانڈھی، کورنگی اور ملیر تک پھیلی جہاں گرج چمک کے ساتھ بارش ہوئی۔

طوفان کی وجہ سے درخت اور سڑک کے کنارے لگے اسٹالز اکھڑ گئے جس سے مکینوں میں خوف و ہراس پھیل گیا۔ بہادرآباد، حسن اسکوائر، نیپا چورنگی، لیاقت آباد، شریف آباد، گلشن اقبال بلاک 13-D/2، اسکیم 33، بھینس کالونی، احسن آباد، گلشن معمار، کورنگی، کالا پل سمیت کئی علاقوں میں پانی جمع ہوگیا۔

پاکستان میٹرولوجیکل ڈیپارٹمنٹ (پی ایم ڈی) کے چیف میٹرولوجسٹ سردار سرفراز نے کہا کہ مون سون کے اس اسپیل کا عروج ابھی آنا باقی ہے، سردار سرفراز نے خبردار کیا کہ کراچی میں آج رات سے موسلادھار بارشیں شروع ہوں گی اور اگلے تین سے چار روز تک جاری رہیں گی۔