گوگل نیوز پر ہمیں فالو کریںکراچی: اسٹیٹ بینک آف پاکستان نے احکامات کی خلاف ورزی پر ایکشن لیتے ہوئے بینکوں پر 8 کروڑ روپے کا جرمانہ کردیا ہے۔
تفصیلات کے مطابق اسٹیٹ بینک نے رواں مالی سال کی پہلی سہ ماہی میں بینکوں پر 8کروڑ سے زائد کا جرمانہ کیا۔ جولائی سے ستمبر کے دوران 4 بینکوں کی جانب سے احکامات کی خلاف ورزی پر جرمانے ہوئے۔
اسٹیٹ بینک نے پاکستان کی معیشت پر مبنی سالانہ رپورٹ جاری کردی
اسٹیٹ بینک کا کہنا ہے کہ بینکوں پر 8 کروڑ 31لاکھ روپے کا جرمانہ عائد کیا گیا۔ بینکوں نے زرِ مبادلہ اور بینکنگ خدمات کے احکامات کی خلاف ورزی کی جس پر اسٹیٹ بینک نے سخت ایکشن لیا۔
یاد رہے کہ اس سے قبل اسٹیٹ بینک نے پاکستان کی معیشت کی کیفیت پر مبنی سالانہ رپورٹ جاری کردی، سالانہ رپورٹ کے مطابق مالی سال 2022-23 کے دوران ملکی معیشت کو متعدد چیلنجز کا سامنا رہا۔
رپورٹ کے مطابق روس یوکرین تنازع کی وجہ سے مالی سال 22ء کی دوسری ششماہی میں ہی معیشت کو چیلنجز کا سامنا رہا، سیلاب سے معاشی سرگرمیاں متاثر ہوئیں، مہنگائی بڑھی، اور مالیاتی عدم توازن وسیع ہوا۔
عالمی سطح پر اجناس کی بڑھتی قیمتوں اور بیرونی ذرائع سے رقوم کی آمد میں کمی سے مختلف شعبے متاثر ہوئے، اوسط مہنگائی کئی دہائیوں کی بلند ترین سطح پر پہنچ گئی۔
