گوگل نیوز پر ہمیں فالو کریںامریکہ اور چند یورپی ریاستیں جیسے نیدرلینڈز، سوئٹزرلینڈ، فرانس اور آسٹریا اور scandinavian ممالک نے مسلم مخالف مظاہروں، فلموں اور لٹریچر کو طویل عرصے برداشت کیا، حالانکہ یہ جانتے ہوئے کہ اس کی جان بوجھ کر، منصوبہ بندی اور سرکاری طور پر اسپانسر کی گئی کارروائیوں سے دنیا بھر میں تقریباً دو ارب مسلمانوں کو تکلیف پہنچتی ہے، مزید برآں، ”سیکولر مغربی اقدار” جہاں انفرادی آزادی اور آزادیوں کی آڑ میں قرآن پاک کو جلانے کی مسلسل درخواستوں کومختلف یورپی ممالک میں حکومت کی حمایت حاصل ہے۔
تاہم، ایک قابل تعریف اقدام میں ڈنمارک کی حکومت نے ایک ایسا بل تجویز کیا ہے جس کے تحت عوامی مقامات پر قرآن یا کسی اور مذہبی مقدس کتاب کی بے حرمتی کو غیر قانونی قرار دیا جائے گا۔پاکستان نے اس اقدام کا خیر مقدم کرتے ہوئے اسے درست سمت میں ایک قدم قرار دیا ہے۔اس بل کا اعلان جمعہ 25 اگست 2023 کو وزیر انصاف پیٹر ہملگارڈ نے کیا تھا، اس کا مقصد قومی سلامتی کا تحفظ اور دنیا کو یہ اشارہ دینا ہے کہ ڈنمارک مذہبی آزادی اور تنوع کا احترام کرتا ہے۔
یہ بل ضابطہ فوجداری میں ترمیم کرے گا تاکہ ملک میں موجود مختلف مذہبی برادریوں کی دل آزاری نہ ہوسکے اور اس جرم کے مرتکب افراد کو سزا جرمانے یا دو سال تک قید ہو سکتی ہے۔
یہ بل حالیہ مہینوں کے دوران ڈنمارک اور ہمسایہ ملک سویڈن میں قرآن پاک کو نذر آتش کئے جانے کے باعث پیش کیا گیا ہے، کیونکہ گستاخی کے اس عمل نے کئی مسلم ممالک میں غم و غصے اور مظاہروں کو جنم دیا تھا۔اسلامی تعاون تنظیم (او آئی سی) نے اپنے ارکان سے مطالبہ کیا ہے کہ وہ ان ممالک کے خلاف مناسب کارروائی کریں جہاں قرآن کی بے حرمتی ہو رہی ہے۔امریکہ اور برطانیہ کی حکومتوں نے بھی خبردار کیا کہ ان واقعات نے خطے میں دہشت گردی کے خطرے کو جنم دیا ہے۔
اب وقت آگیا ہے کہ دوسرے مغربی ممالک ڈنمارک کی مثال کی پیروی کریں اور یہ سمجھیں کہ آزادی اظہار اور اسلامو فوبیا کے درمیان ایک واضح لکیر ہے، جسے بدقسمتی سے بار بار عبور کیا جا رہا ہے،نفرت اور تشدد پر اکسانے کو دنیا بھر کے تمام قانونی نظاموں میں آزادانہ تقریر سے واضح طور پر الگ کیا جانا چاہیے۔قانون سازی کے علاوہ، مغربی میڈیا تنظیموں کا فرض ہے کہ وہ باوقار گفتگو کو فروغ دیں۔
