نظام المدارس پاکستان کے ناظم اعلیٰ علامہ میر آصف اکبر نے وزیراعظم کی طرف سے مدارس دینیہ کیلئے بینک اکاؤنٹس کھلوانے کی پابندی ختم اور رجسٹریشن کے نظام کو تبدیل کرنے پر تشویش کا اظہار کرتے ہوئے کہا کہ اگر ایسا ہوا تو مدارس کو ریگولیٹ کرنے کا قومی اصلاحاتی پروگرام بے مقصد ہو جائے گا اور اس ضمن میں عوام کے خون پسینے کے ٹیکسوں کے خرچ ہونے والے کروڑوں روپے ضائع ہو جائیں گے۔

چند ڈیفالٹر شخصیات مدارس کے بینک اکاؤنٹس کھلوانے سے خوفزدہ کیوں ہیں؟ چند اجارہ دار مفاد پرست ہزاروں دینی مدارس کو قانون کی بجائے صوابدید کے مطابق چلانا چاہتے ہیں جسکی وجہ سے ہزراوں مدارس نے ان سے لا تعلقی اختیار کر لی ہے ایسا دنیا کے کسی اور اسلامی ملک میں ممکن نہیں ہے۔
یہ بھی پڑھیں:

انہوں نے کہا کہ غیر ملکی اور نامعلوم فنڈنگ روکنے کیلئے اکاؤنٹ کی شرط برقرار رہنی چاہیے۔

انہوں نے کہا کہ مدارس دینیہ کو قومی دھارے میں شامل کرنے کیلئے 2سال سے ریاستی سطح پر جامع اصلاحاتی پروگرام چل رہا ہے اس کے خاطر خواہ نتائج آنا شروع ہو گئے ہیں مگر وزیراعظم اس سارے اصلاحاتی پروگرام کے برعکس سیاسی مفادات اور ایک شخص اور اسکے کارندوں کے لیے فیصلے دینا شروع ہو گئے ہیں۔

انہوں نے مزید کہا کہ حکومت ہر سطح کے تعلیمی اداروں، دوکانداروں یہاں تک کے چھابڑی فروشوں کو بھی مجبور کررہی ہے کہ وہ بینکوں کے ذریعے لین دین کریں اور عالمی ادارے بھی دستاویزی معیشت پر زور دے رہے ہیں مگر حیرت ہے کہ مدارس دینیہ کو اس ضمن میں استثنیٰ دیا جارہا ہے۔

دنیا کا کوئی ملک دوہرے اور تہرے نظام تعلیم کے ساتھ نہ تو ترقی کر سکتا ہے اورنہ ہی استحکام کی منزل کو پا سکتا ہے۔ انہوں نے کہا کہ نامعلوم فنڈنگ ایک بہت بڑا مسئلہ ہے اس حوالے سے کسی قسم کا کمپرومائز نہیں ہونا چاہیے؟