گوگل نیوز پر ہمیں فالو کریںکراچی میں 15 جنوری کے بلدیاتی انتخابات کے دوسرے مرحلے کے اعلان کے بعد انتخابات کی تیاریوں کے سلسلے میں جے یوآئی کراچی میں عوامی رابطہ اور انتخابی مہم کا آغاز پیر 2 جنوری سے کرے گی۔
جمعیت علماء اسلام صوبہ سندھ کے سیکریٹری جنرل علامہ راشد محمود سومرو پیر 2 جنوری سے کراچی کے مختلف اضلاع کا دورہ کریں گے۔ جے یوآئی سندھ کے ڈپٹی سیکریٹری اطلاعات علامہ سمیع الحق سواتی کے مطابق علامہ راشد محمود سومرو 2 جنوری پیر کی شام کو جے یوآئی ضلع غربی کے نئے سیکریٹریٹ کا افتتاح کریں گے اور بعد ازاں جامعہ منبع العلوم گرم چشمہ منگھوپیر میں ضلع غربی کے جنرل کونسل کے اراکین سے خطاب کریں گے۔
اس موقع پر جےیوآئی کے مرکزی ترجمان محمد اسلم غوری، صوبائی نائب امیر مولانا عبدالکریم عابد ، صوبائی ناظمین مولانا محمد غیاث ، مولانا سمیع الحق سواتی ، حاجی امین اللہ ، ضلعی ذمہ داران مفتی محمد خالد ، مولانا احسان ٹکروی ، انجینئر محمد سلیم، مولانا اجمل شیرازی ودیگر بھی ان کے ہمراہ دورہ کراچی میں شامل ہوں گے۔
ان کے مطابق علامہ راشد محمود سومرو منگل 3 جنوری کی دوپہر ملیر بار میں وکلاء سے خطاب کریں گے اور ملیر میں حال میں انتقال کرنے والے ملک کے معروف عالم دین حضرت مولانا عبیداللہ احرار رحمہ اللہ کے انتقال پر ان کی رہائش گاہ پر تعزیت کیلئے جائیں گے۔ جبکہ سہہ پہر 3 بجے ملیر پریس کلب میں مقامی صحافیوں کی جانب سے منعقدہ میٹ دی پریس پروگرام میں شرکت کریں گے۔
جے یوآئی قائدین سہہ پہر 4 بجے داؤد چورنگی پر ضلع ملیر کے جنرل کونسل کے اراکین اور شام 6 بجے بھینس کالونی اور بعد ازاں شاہ لطیف ٹاؤن میں عوامی اجتماعات سے خطاب کریں گے۔
یہ بھی پڑھیں:
زرداری کا وزیراعظم کو ٹیلی فون، ملکی سیاسی صورتحال پر تبادلہ خیال
